اقش پرەزيدەنتى دجو بايدەن امەريكالىق ءانشى، ءان جازۋشى، پروديۋسەر، ديزاينەر جانە اكتريسا لەدي گاگانى پرەزيدەنت جانىنداعى ونەر جانە گۋمانيتارلىق عىلىمدار كوميتەتىنىڭ تەڭ توراعاسى ەتىپ تاعايىندادى. بۇل تۋرالى اقپارات اق ءۇيدىڭ سايتىندا جاريالانعان.
«پرەزيدەنت بايدەن پرەزيدەنت جانىنداعى ونەر جانە گۋمانيتارلىق عىلىمدار كوميتەتىنە كەلەسى تۇلعالاردى تەڭ توراعالار ەتىپ تاعايىنداۋ نيەتىن مالىمدەدى: بريۋس كوەن، لەدي گاگا»، - دەلىنگەن پرەزيدەنتتىڭ ءباسپاسوز قىزمەتى تاراتقان حابارلامادا.
سونداي-اق سايتتا ءانشىنىڭ ءومىربايانى جاريالانعان. 37 جاستاعى لەدي گاگا (شىن اتى ستەفاني دجوان اندجەلينا جەرمانوتتا) گرەممي سىيلىعىنىڭ يەگەرى جانە تاريحتاعى كوممەرتسيالىق جاعىنان ەڭ تابىستى ورىنداۋشىلاردىڭ ءبىرى. ول قايىرىمدىلىق جانە الەۋمەتتىك ناۋقاندارعا بەلسەندى قاتىسادى.
