وزبەكستاننىڭ قاشقاداريا وبلىسىندا گاز قۇيۋ بەكەتىندە جارىلىس بولدى، دەپ حابارلايدى "ادىرنا" ۇلتتىق پورتالى.
وقيعا 5 تامىز كۇنى كوكدالا اۋدانىنداعى «التىندالا» ىقشام اۋدانىندا ورىن الدى.
سوڭعى 20 كۇن ىشىندە ەكىنشى رەت گاز قۇيۋ بەكەتىندە توتەنشە جاعداي تىركەلدى.
وزبەكستان رەسپۋبليكاسى توتەنشە جاعدايلار مينيسترلىگىنىڭ مالىمەتىنشە، گاز قۇيۋ بەكەتىنىڭ اۋماعىندا سۇيىتىلعان پروپان گازىن تاسىمالدايتىن جۇك كولىگىنەن ارنايى تسيستەرناعا گاز قۇيۋ كەزىندە ءورت تۇتانىپ، ارتى جارىلىسقا ۇلاسقان.
وقيعا ورنىنا ساعات 22:22-دە ءورت ءسوندىرۋ جانە قۇتقارۋ قىزمەتىنىڭ 5 توبى دەرەۋ جەتىپ، جالىن 22:30-دا اۋىزدىقتالىپ، 22:50-دە تولىقتاي سوندىرگەن.
توتەنشە جاعداي سالدارىنان 1 اۆتوتسيستەرنا مەن كولەمى 10 تەكشە مەتر بولاتىن سۇيىتىلعان پروپان ساقتايتىن تسيستەرنا جانىپ كەتكەن. سونىمەن قاتار، اۆتوتسيستەرنا جۇرگىزۋشىسى جەڭىل كۇيىك الىپ، مەديتسينالىق كومەككە جۇگىنگەن.
ايتا كەتەيىك، بۇعان دەيىن، 16 شىلدە كۇنى وسى اۋدانداعى تاعى ءبىر گاز قۇيۋ بەكەتىندە جارىلىس بولىپ، 4 ادام كوز جۇمعان ەدى.
