وتكەن دەمالىس كۇندەرى شىمكەنت قالاسىنىڭ بوزارىق اۋدانىندا ورنالاسقان جاڭا يپپودرومنىڭ رەسمي تەحنيكالىق اشىلۋى ءوتتى. ءىس-شاراعا قالا اكىمى مۇرات ايتەنوۆ قاتىستى.
حالىقارالىق دەڭگەي
نىسان بارلىق حالىقارالىق ستاندارتتارعا سايكەس سالىنعان، بۇل شىمكەنتكە جاڭا ينۆەستيتسيالار مەن بيزنەستى دامىتۋ ءۇشىن تارتىلىس نۇكتەسى بولۋعا مۇمكىندىك بەرەدى.
«يپپودرومدا كونكۋرمەن اينالىساتىن بالالارىمىزدىڭ العاشقى جاتتىعۋلارى باستالدى. مۇندا وليمپيادالىق رەزەرۆتەگى ات سپورتى مەكتەبىندەگى جاتتىقتىرۋشىلاردىڭ بارلىق قۇرامى مەن جىلقىلار كوشىرىلدى. ءبىز يپپودرومنىڭ ورنالاسقان جەرىنىڭ وزگەرۋىنە، سونداي-اق قالادا وسىنداي زاماناۋي نىساننىڭ پايدا بولعانىنا وتە قۋانىشتىمىز. ەندى مۇندا جاتتىعىپ قانا قويماي، ءىرى حالىقارالىق جارىستار مەن بايگەلەر، ۇلتتىق سپورت تۇرلەرى بويىنشا كەزدەسۋلەر مەن وليمپيادالىق ىرىكتەۋ كەزەڭدەرىن وتكىزۋگە بولادى. ءبىزدىڭ فەدەراتسيا باسقا ەلدەردەن كەلگەن دەلەگاتسيالاردى ماقتانىشپەن قارسى الا الادى. قۇرىلىس سالۋشى مەن اكىمدىككە وسىنداي تاماشا سىيلىق پەن بالالاردىڭ بولاشاعىنا قوسقان باعا جەتپەس ۇلەسى ءۇشىن العىس ايتامىز»، - دەپ اتاپ ءوتتى جاس سپورتشىلاردىڭ اتا-انالارى.
تابىستى سەرىكتەستىك جانە مىقتى كوماندا
بۇل يپپودروم – مەملەكەتتىڭ، بيزنەستىڭ جانە ۇكىمەتتىك ەمەس ۇيىمداردىڭ بىرلەسكەن جۇمىسىنىڭ ناتيجەسى. جوبادا 500-دەن استام ادام جانە 20 مەردىگەر ۇيىم ەڭبەك ەتتى.
«بۇل جوباعا بار كۇش-جىگەرىمىزدى سالدىق. قۇرىلىسشىلار وسى جەردە قانشاما ۇيقىسىز تۇندەرىن وتكىزدى، ويتكەنى بيىل يپپودرومدى تاپسىرىپ، قالاعا كەرەمەت جاڭا جىلدىق سىيلىق جاساعىسى كەلدى. سەرىكتەستەرمەن، شاعىن جانە ورتا بيزنەس وكىلدەرىمەن بىرلەسىپ ۇلكەن جۇمىس اتقارىلدى. قاجىرلى ەڭبەگى مەن شىنايى نيەتى ءۇشىن ءوز كومانداما العىس ايتامىن. ءبىز سىيلىعىمىزدى شىمكەنت تۇرعىندارىنا زور قۋانىشپەن تابىستايمىز! ول قازاقستان ءۇشىن ءداستۇرلى ات سپورتىن ودان ءارى دامىتۋعا ىقپال ەتەدى دەپ ۇمىتتەنەمىز. جوبانىڭ ينۆەستورى بولعانىمىزعا قۋانىشتىمىز»، - دەدى جوبا جەتەكشىسى ايدىن جاكەجانوۆ.
قارقىن مەن ماسشتاب
بۇل – ەلىمىزدەگى ەڭ ۇلكەن يپپودروم بولىپ تابىلادى جانە ونىڭ وڭتۇستىك وڭىردەگى باستى كورىكتى جەرلەردىڭ بىرىنە اينالاتىنى ءسوزسىز.
يپپودروم 1500 كورەرمەنگە ارنالعان. وندا ات ارەناسى بار مانەجدەردەن بولەك، 53 اتقا ارنالعان ات قورا، مىنبەرى بار جابىق عيمارات، ۆەتەرينارلىق بولىمشە، قوسىمشا بولمەلەر، 310 كولىككە ارنالعان كەڭ تۇراق بار. مىنبەردىڭ جوعارعى قاباتى اشىق تەرراسسامەن قامتىلعان.
ويىندار مەن جارىستار ءۇشىن ارنايى امورتيزاتسيالاعىش قورشاۋمەن قورشالعان ۇزىندىعى 2012 مەترلىك جارىس جولى قاراستىرىلعان. ول جىلقىلار مەن شاباندوزداردىڭ قاۋىپسىزدىگىن قامتاماسىز ەتەدى. سونداي-اق كوكپار مەن كونكۋرگە ارنالعان الاڭ بار.
الاڭدار كۆارتس قۇمىمەن تولتىرىلعان. ال ارنايى جاسىل ايماق تابيعي تاستارمەن، ءتۇرلى كوشەتتەرمەن جانە كۇركەلەرمەن جابدىقتالعان.
قۇرىلىس باستالعاننان بەرى جۇمىس كولەمى بۇرىن جوسپارلانعانمەن سالىستىرعاندا ەداۋىر وسكەن. يگەرۋ الاڭى 1,5 ەسەگە - 24 گەكتاردان 39 گەكتارعا دەيىن، بايگەگە ارنالعان شەڭبەر ۇزىندىعى - 14 مىڭنان 41 مىڭ شارشى مەترگە دەيىن، ەنى - بىردەن ەكى ەسەگە - 10-نان 20 م-گە دەيىن كەڭەيتىلگەن. كوكپار الاڭى 16 مىڭنان 18 مىڭ شارشى مەترگە دەيىن ۇلعايتىلعان. جەر جۇمىستارىنىڭ كولەمى 550 000 م3 وسكەن — بۇل 27000 جۇك كولىگى.
نىساندى سالۋشى BI Group كومپانياسى جوباعا ءوز قاراجاتى ەسەبىنەن قۇنى 1 ملرد تەڭگە بولاتىن مانەج قۇرىلىسىن قوسقان. يپپودروم قۇرىلىسى كومپانياعا 6 ملرد تەڭگەگە ءتۇستى.
يپپودرومنىڭ رەسمي اشىلۋ 2023 جىلدىڭ كوكتەمىنە جوسپارلانعان.
