تۇركىستان وبلىسىندا اۆتوگاز قۇيۋ بەكەتىندە جارىلىس بولىپ، ەكى ادام قازا تاپتى، تاعى ۇشەۋى جاراقات الدى، دەپ حابارلايدى "ادىرنا" ۇلتتىق پورتالى.
وبلىستىق تجد مالىمەتىنشە، وقيعا 21 ناۋرىز كۇنى ورىن العان.
"21 ناۋرىز كۇنى ساعات 16:30-دا تۇركىستان وبلىسى تجد كەزەكشى بولىمىنە شاردارا اۋدانى، جاۋشىقۇم اۋىلىنداعى اۆتوگاز قۇيۋ بەكەتىندە گاز باعانىنىڭ جارىلعانى تۋرالى حابار ءتۇستى", – دەلىنگەن حابارلامادا.
وقيعا ورنىنا جەتكەن قۇتقارۋشىلار جارىلىستىڭ جەڭىل اۆتوكولىكتىڭ اۆتوگاز قۇيۋ بەكەتىنە سوقتىعىسۋىنان كەيىن بولعانىن انىقتاعان.
سوقتىعىس سالدارىنان گاز تسيستەرناسى زاقىمدالىپ، گازدىڭ سىرتقا شىعۋى مەن گاز-اۋا قوسپاسىنىڭ تۇتانۋى ورىن العان. ءورت جاقىن ماڭدا تۇرعان كولىككە دە تارادى. كەيىننەن ءورت سوندىرۋشىلەر جالىندى تولىقتاي وشىرگەن.
"وقيعا سالدارىنان ەكى ادام قازا تاۋىپ، ءۇش ادام كۇيىك جاراقاتىن الدى", – دەپ حابارلادى ۆەدومستۆونىڭ ءباسپاسوز قىزمەتى.
دارىگەرلەر باستاپقىدا ءبىر زارداپ شەككەن ادامدى اۋرۋحاناعا جاتقىزدى، كەيىن تاعى ەكى ادام ءوز ەركىمەن مەديتسينالىق كومەككە جۇگىنگەن.
