قازاقستاندىق مانەرلەپ سىرعاناۋشى، قىسقى وليمپيادا چەمپيونى ميحايل شايدوروۆ بىرنەشە اي بويى جالاقى الماعانىن ايتىپ، سونداي-اق سپورتتىق اتاق بەرۋ مەن مەملەكەتتىك قولداۋ شارالارىنا قاتىستى سۇراقتاردى كوتەرگەن. وسىعان بايلانىستى جاعدايعا تۇسىنىكتەمە بەرۋ ءۇشىن تۋريزم جانە سپورت ءمينيسترى ەربول مىرزابوسىنوۆ پىكىر ءبىلدىردى. بۇل تۋرالى Zakon.kz جازدى، دەپ حابارلايدى “ادىرنا”.
ۆەدومستۆونىڭ مالىمەتىنشە، ميحايل شايدوروۆ بۇرىنعى وليمپيادالىق تسيكل بويىنشا كەلىسىمشارت نەگىزىندە جالاقى العان، ال بۇل قۇجات 2026 جىلدىڭ اقپانىندا اياقتالعان. ناۋرىز ايىنان باستاپ جاڭا وليمپيادالىق تسيكلگە ارنالعان جاڭا كەلىسىمشارت جاسالۋى ءتيىس بولعان. الايدا ول ءالى كۇنگە دەيىن قول قويىلماعاندىقتان، جاڭا كەزەڭ بويىنشا تولەمدەرگە قۇقىقتىق نەگىز جوق.
مينيسترلىك جاڭا كەلىسىمشارت سپورتشىنىڭ وليمپيادالىق چەمپيونى رەتىندەگى ستاتۋسىن ەسكەرە وتىرىپ، تيىمدىرەك شارتتارمەن ۇسىنىلعانىن اتاپ ءوتتى. دەگەنمەن تاراپتار «مىندەتتەمەلەر» تارماعى بويىنشا ورتاق كەلىسىمگە كەلە الماي وتىرعانى ايتىلدى.
ۆەدومستۆونىڭ تۇسىندىرۋىنشە، ۇلتتىق قۇراما سپورتشىلارىمەن جاسالاتىن كەلىسىمشارتتار ۇلگىلىك سيپاتتا بولادى جانە بارلىق سپورتشىلارعا بىردەي قولدانىلادى. بۇل قۇجات وقۋ-جاتتىعۋ جيىندارىن، جارىستارعا قاتىسۋدى، مەديتسينالىق سۇيەمەلدەۋدى جانە جالاقى تولەۋ ءتارتىبىن رەتتەيدى.
مينيسترلىك وكىلدەرى كەلىسىمشارتقا قول قويىلعاننان كەيىن بارلىق قارجىلىق ماسەلەلەر رەتتەلەتىنىن جانە سپورتشىعا تيەسىلى تولەمدەر تولىق كولەمدە تولەنەتىنىن مالىمدەدى.
سونداي-اق ۆەدومستۆو وكىلدەرى شايدوروۆتىڭ «قىسىم جاسالىپ جاتىر» دەگەن پىكىرىن جوققا شىعارىپ، مۇنداي جاعدايدىڭ جوق ەكەنىن اتاپ ءوتتى. ولاردىڭ ايتۋىنشا، بارلىق ماسەلە تەك ۇيىمداستىرۋشىلىق جانە قۇقىقتىق سيپاتقا يە.
“ميحايل شايدوروۆقا وليمپيادا التىنى ءۇشىن قاراستىرىلعان سىياقىنى تولەۋ ماۋسىم–شىلدە ايلارىنا جوسپارلانعان. ال سپورتتىق اتاق بەرۋ تۋرالى بۇيرىققا قول قويىلعان جانە ول جاقىن ۋاقىتتا رەسمي تۇردە تابىستالماق”، – دەدى مينيستر.
مينيسترلىك بارلىق ماسەلەلەر زاڭ اياسىندا جانە ءوزارا تۇسىنىستىك نەگىزىندە شەشىلەتىنىن، ال مەملەكەت سپورتشىلار الدىنداعى مىندەتتەمەلەرىن تولىق ورىندايتىنىن جەتكىزدى.
ميحايل شايدوروۆ ماسەلەسىنەن كەيىن Prokzsport رەداكتسياسى قازاقستاننىڭ وليمپيادا چەمپيوندارىمەن بايلانىسقا شىقتى.
سپورتشىلاردىڭ ايتۋىنشا، قوعامدا مەملەكەتتىك قولداۋ تۇرلەرى ءجيى شاتاستىرىلىپ ءجۇر. 250 مىڭ دوللار كولەمىندەگى سىياقى، پاتەر جانە ءومىر بويعى تولەمدەر - وليمپيادادا جەڭىسكە جەتكەن سپورتشىلارعا بەرىلەتىن زاڭمەن بەكىتىلگەن ماراپاتتار. بۇل تولەمدەر سپورتشىنىڭ كەيىنگى جىلدارداعى جالاقىسىنا نەمەسە جاڭا وليمپيادالىق تسيكلدەگى قارجىلاندىرۋعا اسەر ەتپەيدى.
سونىمەن قاتار، ءاربىر وليمپيادالىق تسيكل اياقتالعاننان كەيىن سپورتشىلارمەن جاڭا كەلىسىمشارت جاسالادى. بۇل قۇجات وقۋ-جاتتىعۋ جيىندارىن، حالىقارالىق جارىستارعا قاتىسۋدى جانە جالپى دايىندىق پروتسەسىن قارجىلاندىرۋ ءتارتىبىن رەتتەيدى.
مامانداردىڭ پىكىرىنشە، كەلىسىمشارتسىز سپورتشىعا جالاقى تاعايىنداۋ جانە تولىققاندى دايىندىقتى قامتاماسىز ەتۋ مۇمكىن ەمەس. بۇل كاسىبي سپورتتاعى قالىپتى تاجىريبە رەتىندە قاراستىرىلادى.
چەمپيوندار ميحايل شايدوروۆتىڭ قازىرگى تاڭدا قازاقستان سپورتىنىڭ جەتەكشى وكىلدەرىنىڭ ءبىرى ەكەنىن اتاپ ءوتتى. ولاردىڭ ايتۋىنشا، ماڭىزدىسى — جاعدايدى ۋشىقتىرماي، بارلىق قۇقىقتىق راسىمدەردى ۋاقتىلى اياقتاۋ.
