اقتاۋدا كوپقاباتتى ۇيلەردىڭ بىرىندە ەكى بالانىڭ ولىمىنە قاتىستى قىلمىستىق ءىس قوزعالدى، دەپ حابارلايدى "ادىرنا" ءتىلشىسى لادا اگەنتتىگىنە سىلتەمە جاساپ.
20 قازان كۇنى اقتاۋداعى كوپ قاباتتى پاتەرلەردىڭ بىرىندە جاندىكتەردى ۋلاۋ جۇمىستارى جۇرگىزىلگەن بولاتىن. الايدا ەرتەسىنە تاڭەرتەڭ تۇرعىن ءۇيدىڭ جوعارىداعى قاباتىندا تۇراتىن وتباسىنىڭ ەكى بالاسى قايتىس بولدى. سول وتباسىنىڭ تاعى ەكى بالاسى اۋرۋحاناعا تۇسكەن.
«اتالعان فاكتى ماڭعىستاۋ وبلىسى بويىنشا قىلمىستىق كودەكستىڭ 304-بابىنىڭ 3-بولىگىمەن (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان سانيتارلىق ەرەجەلەردى نەمەسە گيگيەنالىق نورمالاردى بۇزۋ) بويىنشا تىركەلدى. جازا ءۇش جىلعا دەيىنگى مەرزىمگە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ايىرا وتىرىپ نەمەسە بەس جىلدان 10 جىلعا دەيىنگى مەرزىمگە باس بوستاندىعىنان ايىرۋدى قامتيدى. ساراپتاما تاعايىندالدى»، - دەدى پوليتسەيلەر.
اقتاۋ قالاسىندا جاندىكتەردى ۋلاۋ كەزىندە 6 جاستاعى بالا قايتىس بولدى. تاعى 2 بالا اۋرۋحاناعا جەتكىزىلگەن. تۇرعىنداردىڭ ايتۋىنشا، تومەنگى قاباتتاعى ەكى كورشى جاندىكتەرگە قارسى ءوز بەتتەرىنشە ءدارى سەپكەن. بىراق، بۇل حيميالىق ۋلاۋ بارىسى وزگە پاتەر يەلەرىنە ەسكەرتىلمەگەن بولىپ شىقتى.
«ول ارنايى قىزمەتكە حابارلاسپادى. ول الماتىدان زيانكەستەرگە قارسى ءدارى ساتىپ العان كورىنەدى. بەلگىلى بولعانداي، بۇل تۋرالى كورشىلەرىنە حابارلانباعان. كەلەسى كۇنى تاڭەرتەڭ جوعارى قاباتتاعى پاتەردىڭ ەكى كىشكەنتاي بالاسى قايتىس بولدى. جەدەل جاردەم قىزمەتكەرلەرى ولاردى قۇتقارا المادى. بالالار اۋرۋحاناسىنا ءبىر وتباسىنان تاعى ەكى كامەلەتكە تولماعان بالا ءتۇستى»، - دەلىنگەن حابارلامادا.
