اقتاۋدا Instagram الەۋمەتتىك جەلىسى ارقىلى تاۋار ساتۋعا قاتىستى الاياقتىق دەرەگى بويىنشا سوتقا دەيىنگى تەرگەۋ ءجۇرىپ جاتىر، دەپ حابارلايدى "ادىرنا" ۇلتتىق پورتالى.
كۇدىكتىلەردىڭ اراسىندا 360 مىڭنان استام جازىلۋشىسى بار پاراقشانىڭ يەسى دە بار. بۇل تۋرالى Zakon.kz حابارلادى.
ماڭعىستاۋ وبلىستىق پوليتسيا دەپارتامەنتىنىڭ مالىمەتىنشە، كۇدىكتى الەۋمەتتىك جەلىدە قىتايدان ءتۇرلى تاۋارلاردى، سونىڭ ىشىندە پرەميۋم ساناتتاعى ىدىس-اياق پەن تۇرمىستىق تەحنيكانى جەتكىزۋ تۋرالى جارناما جاريالاعان. ونىمدەر نارىقتاعى باعادان ەداۋىر ارزان ۇسىنىلعان.
تەرگەۋ نۇسقاسىنا سايكەس، تاۋارلاردى جارنامالاۋ ءۇشىن 360 مىڭنان استام جازىلۋشىسى بار Instagram پاراقشاسىنىڭ يەسى تارتىلعان. جارنامالاردا ونىمدەردىڭ قولدا بار ەكەنى، ساپاسى جانە قازاقستانعا جەتكىزۋ مۇمكىندىگى تۋرالى اقپارات بەرىلگەن. كەيىن ازاماتتار كورسەتىلگەن بايلانىس نومىرلەرى ارقىلى حابارلاسىپ، تاۋار ساتىپ الۋ ءۇشىن جەكە كاسىپكەردىڭ ەسەپشوتىنا اقشا اۋدارعان.
الايدا تاپسىرىس بەرىلگەن تاۋارلار جەتكىزىلمەگەن. تەرگەۋ دەرەگىنە سۇيەنسەك، تۇسكەن قاراجات جەكە ماقساتتارعا جۇمسالعان. قازىرگى ۋاقىتتا ىدىس-اياق پەن تۇرمىستىق تەحنيكاعا اقشا اۋدارعان ازاماتتار جابىرلەنۋشى رەتىندە انىقتالعان.
اتالعان دەرەك بويىنشا قىلمىستىق ءىس قوزعالدى. كۇدىكتىلەر ۇستالىپ، ۋاقىتشا ۇستاۋ يزولياتورىنا قامالعان. پوليتسيا وقيعانىڭ بارلىق ءمان-جايىن انىقتاۋ جانە وزگە دە زارداپ شەككەن ازاماتتاردى تابۋ باعىتىندا تەرگەۋ امالدارىن جۇرگىزىپ جاتىر.
قۇقىق قورعاۋ ورگاندارى ازاماتتاردى الەۋمەتتىك جەلى ارقىلى تاۋار ساتىپ العاندا ساق بولۋعا، ساتۋشى تۋرالى اقپاراتتى تەكسەرۋگە جانە كۇماندى ەسەپشوتتارعا اقشا اۋدارماۋعا شاقىردى.
تەرگەۋ مۇددەسىنە بايلانىستى وزگە اقپارات جاريالانبايدى.
