قازاقستان پرەمەر-ءمينيسترىنىڭ ورىنباسارى قانات بوزىمباەۆ 2024 جىلدىڭ جەلتوقسانىندا اقتاۋدا ورىن العان AZAL اۋە كومپانياسىنىڭ ۇشاعى اپاتىنا قاتىستى تەرگەۋدىڭ بارىسى تۋرالى پىكىر ءبىلدىردى، دەپ حابارلايدى “ادىرنا”.
ونىڭ ايتۋىنشا، كولىك مينيسترلىگى اپاتتىڭ سەبەپتەرىن انىقتاۋ ءۇشىن حالىقارالىق ساراپشىلاردى تارتا وتىرىپ، بەلسەندى جۇمىس جۇرگىزىپ جاتىر. اپاتقا ۇشىراعان ۇشاقتىڭ كەيبىر جابدىقتارى شەتەلدە ساراپتامادان وتۋدە، ال تالداۋ كەزەڭى اياقتالۋعا جاقىن. جاقىن ارادا تۇپكىلىكتى ەسەپتى دايىنداۋ باستالادى.
بوزىمباەۆتىڭ ايتۋىنشا، اپاتقا قاتىستى جالعىز اشىق سۇراق – فيۋزەلياجدىڭ زاقىمدانۋ سيپاتىنا بايلانىستى.
«مەن ونىڭ قالاي زاقىمدانعانى تۋرالى ساياسي پىكىر ايتقىم كەلمەيدى. بۇل سۇراقتارعا قۇقىق قورعاۋ ورگاندارى جۇرگىزىپ جاتقان جارىلىس-تەحنيكالىق ساراپتاما جاۋاپ بەرۋى ءتيىس. مەنىڭ بىلۋىمشە، ولار ءارتۇرلى زاقىمدايتىن ەلەمەنتتەرى بار قارۋ-جاراق قولدانىستا بولاتىن ەلدەرگە سۇراۋ جىبەردى. ونداي ەلەمەنتتەر قۇلاعان ۇشاقتىڭ فيۋزەلياجىنان تابىلدى. ءبىزدىڭ ويىمىزشا، جىلدىڭ سوڭىنا دەيىن شىندىق تولىق انىقتالادى»، – دەدى ۆيتسە-پرەمەر.
ول تەرگەۋ قر كولىك مينيسترلىگى جانىنان قۇرىلعان كوميسسيا اياسىندا جۇرگىزىلىپ جاتقانىن جانە وعان ازەربايجان، رەسەي ەلدەرىنىڭ، سونداي-اق ۇشاق ءوندىرۋشىسى Embraer كومپانياسىنىڭ ماماندارى قاتىسىپ جاتقانىن اتاپ ءوتتى.
بوزىمباەۆ تەرگەۋ اشىق ءجۇرىپ جاتقانىن، ەشقانداي قۇپيا جوق ەكەنىن ايتتى. شەتەلدىك ساراپشىلار استانا مەن اقتاۋعا تۇراقتى تۇردە كەلىپ، بىرلەسىپ جۇمىس ىستەۋدە. ونىڭ ايتۋىنشا، حالىقارالىق سەرىكتەستەرمەن ۇيلەستىرۋدە ەشقانداي قيىندىقتار جوق، بارلىق جۇمىستار اشىق اتقارىلىپ جاتىر.
ۆيتسە-پرەمەر حالىقتى سابىر ساقتاۋعا شاقىرىپ، تۇپكىلىكتى ەسەپ بىرنەشە ايدان كەيىن جاريالاناتىنىن ايتتى.
2025 جىلدىڭ اقپان ايىنىڭ باسىندا قازاقستاندىق ۆەدومستۆونىڭ الدىن الا ەسەبى جاريالانعان. وندا فيۋزەلياجدىڭ قۇيرىق بولىگىندە، تىك قانات پەن تۇراقتاندىرعىشتا، بيىكتىك پەن باعىت رۋليالارىندا «كوپتەگەن تەسىپ وتكەن جانە تەسىپ وتپەگەن زاقىمدانۋلار» سيپاتتالعان. كەيبىر جەرلەردە زاقىمدانۋلاردىڭ تىكبۇرىشتى ءپىشىنى بار ەكەنى كورسەتىلگەن، بۇل سىرتقى نىسانداردىڭ ەنگەنىن كورسەتۋى مۇمكىن.
كەيىنىرەك Reuters اگەنتتىگى دەرەككوزگە سىلتەمە جاساپ، ۇشاقتى رەسەيدىڭ «پانتسير-س» زىمىرانى اتىپ تۇسىرگەنىن حابارلادى. بۇل اقپاراتتى ازەربايجان بيلىگى راستادى، سەبەبى ولاردىڭ قولىندا زىمىراننىڭ سىنىعى قالعان. ولار رەسەي بيلىگى بۇل وقيعاعا قاتىسى بارىن جوققا شىعارىپ، كىنانى ەكيپاجعا جۇكتەۋگە تىرىسىپ جاتىر دەپ مالىمدەپ، رەسەيگە قارسى سوتقا شاعىم دايىنداپ جاتقانىن ايتتى.
