" مەنىڭ پورترەتتەرىمدى كابينەتتەرىڭدە ىلمەڭدەر، پرەزيدەنتتىڭ پورترەتى يكونا ەمەس. شوقىناتىن يسا پايعامباردىڭ بەينەسى ەمەس. ودان دا وتباسىلارىڭنىڭ، بالالارىڭنىڭ سۋرەتتەرىن ىلىڭدەر. قىزمەتتەرىڭدى اتقارعاندا سولاردىڭ كوزدەرىنە ۇيالماي قارايتىن بولىڭدار". ارينە بۇل- پوپۋليزم، بىراق قانداي ادەمى ايتىلعان سوزدەر. مايدان رەۆوليۋتسياسى كلوۋنداردان قايراتكەرلەر جاسادى. پرەزيدەنت بولارىنىڭ الدىندا ول شوۋمەن بولعان. ال باسقا ەلدەردە، اسىرەسە ورتالىق ازيادا زاڭدى پرەزيدەنتتەردەن ساياسات كلوۋن جاسادى.
تۇركىمەنستاننىڭ سوڭعى پرەزيدەنتى گيتارا تارتىپ، نەمەرەلەرىمەن ءان سالادى، اتقا شابادى، بىراق تۇركمەنستان حالقى نان مەن ۇنعا جارىماي وتىر. تاجىكستاندا ءوزارا بيلىككە تالاسىپ، ازامات سوعىسىنان كەيىن حالقى ەسىن جيا الماي وتىر. تاجىكتەر -ەڭبەكقور حالىق. رەسەيمەن قازاقستاندا اۋىر جۇمىس ىستەپ، جۇرەك جالعاپ ءجۇر. وزبەكستاننىڭ پرەزيدەنتى قازاقستانعا اقىل ايتقىش ەدى- مارقۇم كاريموۆ بەس ميلليون وزبەككە جۇمىس تاۋىپ بەرە الماي، حالقىن رەسەيگە كىرىپتار قىلدى. دەموكراتياشىل قىرعىزستاندا ەكونوميكا كەنجەلەپ قالدى. الماتى قالاسىنىڭ ىشكى جيىنتىق ءونىمى بۇكىل قىرعىزستاننىڭ ىشكى جيىنتىق ونىمىنە تەڭ.
زەلەنسكي، ۋكراينانىڭ مۇددەلەرىن باتىل قورعايتىن بولادى. ول رەسەيدەن قىرىمدى قايتارۋدى تالاپ ەتەدى، شىعىس ۋكراينادان - دونباسس پەن لۋگانسك ولكەسىنەن رەسەيدىڭ اسكەرىن شىعارۋدى تالاپ ەتىپ وتىر. ايتايىن دەگەنىم، ۋكراينا باسشىلىعى اقش پەن ەۋروپالىق وداققا رەسەيدىڭ يمپەريالىق ساياساتىن اشكەرەلەپ وتىراتىن بولادى. سوندا ۋكراينانىڭ جاڭا پرەزيدەنتى رەسەيمەن سوعىس اشامىن دەمەيدى. بەيبىت جولمەن ءوز جەرىن قايتارىپ الماق. بۇل وتە دۇرىس ساياسات.
زەلەنسكي رەسەيدىڭ ابىرويىن باتىس ەلدەرى الدىندا توگىپ، رەسەيگە باتىس ەلدەرىنىڭ ەكونوميكالىق، قارجىلىق، پەرسونالدىق سانكتسيالار ارقىلى قىسىم جاسايدى. ولاي بولسا بۇل رەسەيگە ۇلكەن تاۋقىمەت بولماق. ۋكراينانىڭ جاڭا پرەزيدەنتىن اقش پەن ەۋروپالىق وداق تولىق قولدايتىن بولادى. سەبەبى، ۋكراينانىڭ بۇرىڭعى پرەزيدەنتى پوروشەنكونىڭ رەسەيدە ءوز بيزنەسى بولدى. سوندىقتان ول رەسەيمەن پارمەندى تۇردە كۇرەسە المادى.پوروشەنكونىڭ كوررۋپتسياسى دا بولدى.
بۇدان شىعاتىن قورىتىندى: رەسەي ۋكراينى باعىندىرا المايدى. ولاي بولسا بىزگە اۋىز سالمايدى.ەل امان جۇرت تىنىش بولادى.
ءازىمباي عالي
"ادىرنا" ۇلتتىق پورتالى
