ۇلىتاۋ وبلىسىندا ناۋرىز مەرەكەسى جاڭا فورماتتا اتاپ وتىلمەك. بۇل تۋرالى ۇلىتاۋ وبلىسى وڭىرلىك كوممۋنيكاتسيالار قىزمەتىندە وتكەن بريفينگىدە ايتىلدى.
وبلىستا 14-23 ناۋرىز ارالىعىندا «ناۋرىزناما» ونكۇندىگى جاريالانىپ، وبلىس، اۋدان، قالا دەڭگەيىندە بىرقاتار مادەني-تانىمدىق، سپورتتىق-كوپشىلىك جانە قايىرىمدىلىق ءىس-شارالارى وتەدى.
وڭىرلىك كوممۋنيكاتسيالار قىزمەتىندە ۇيىمداستىرىلعان بريفينگىدە ۇلىتاۋ وبلىسى قوعامدىق دامۋ باسقارماسىنىڭ باسشىسى دارحان مۇحان مەن مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ مىندەتىن اتقارۋشى عاليا تۇگەلباەۆا ونكۇندىكتىڭ جوسپارىن تانىستىردى.
«ناۋرىز مەرەكەسىن اتاپ ءوتۋ جونىندەگى جاڭا تۇجىرىمداماعا سايكەس وبلىستىق دەڭگەيدەگى ءىس-شارالار جوسپارى ازىرلەندى. وعان 80-گە جۋىق ءىس-شارا ەنىپ وتىر. ولاردىڭ اراسىندا سالت-ءداستۇر مەن ۇلتتىق عۇرىپتارىمىزدى ناسيحاتتاۋعا باعىتتالعان رۋحاني كەشتەر، ينتەللەكتۋالدى سايىستار، ۇلتتىق سپورت تۇرلەرىنەن جارىستار، از قامتىلعان، كوپبالالى وتباسىلارعا ارنالعان قايىرىمدىلىق شارالارى ەندى»، - دەدى قوعامدىق دامۋ باسقارماسىنىڭ باسشىسى د. مۇحان.
سپيكەردىڭ ايتۋىنشا، ونكۇندىك اياسىندا وبلىستا جاڭا بيزنەس نىساندارىنىڭ اشىلۋى، كەزەكتە تۇرعان ازاماتتارعا پاتەرلەر تابىستاۋ، مەتسەناتتارعا قۇرمەت كورسەتۋ، سۇلۋلىق بايقاۋلارى جوسپارلانىپ وتىر.
21-22 ناۋرىزدا مەرەكەنىڭ نەگىزگى ءىس-شارالارى وتەدى.
«وبلىس ورتالىعىنداعى الاش الاڭىندا كوش كەرۋەنىمەن باستالاتىن ناۋرىز سالتاناتى ەسترادا جۇلدىزدارىنىڭ قاتىسۋىمەن وتەتىن كونتسەرتكە ۇلاسادى. مەرەكەلىك باعدارلاما اياسىندا «قازاعىمنىڭ كيىز ءۇيى»، «قازاعىمنىڭ داستۇرلەرى-اي» كونكۋرستارى، ۇلتتىق سپورت تۇرلەرىنەن سايىستار وتەدى»، - دەدى مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ مىندەتىن اتقارۋشى ع. تۇگەلباەۆا.
مەرەكەلىك ءىس-شارالار وبلىس اۋداندارىنىڭ شالعاي اۋىلدارىندا دا ۇيىمداستىرىلىپ، مەيرام تەك مادەني-كوپشىلىك قانا ەمەس قايىرىمدىلىق سيپات الادى.
ال، 23 ناۋرىزدا جالپى وبلىس اۋماعىندا «تازالىق ەستافەتاسى» ەكولوگيالىق اكتسياسى وتەدى.
