... 1947 جىلدىڭ ساۋىرىندە ۇلىبريتانيا بۇۇ-نا پالەستينا ساۋالىنا جاۋاپ بەرۋدى تالاپ ەتەدى. ارنايى قۇرىلعان كوميسسيا پالەستينانى اراب-ەۆرەي مەملەكەتى قىلىپ ەكىگە بولەمىز بە، الدە ەكى ۇلتقا ءبىر ورتاق مەملەكەت قۇرامىز با دەگەن سۇراققا جاۋاپ ىزدەيدى.
ءبىرىنشى نۇسقا ەۆرەيلەرگە ۇناعانىمەن، ارابتار جەر بەرگىسى كەلمەدى. ال ول كەزدە الەم اقش جانە كسرو دەگەن ەكى لاگەرگە ءبولىنىپ جاتقان ەدى. اقش-تىڭ كىمدەردى قولدايتىنى و باستان بەلگىلى.
كسرو جۇيەسى ءسيونيزمدى ۇناتپايتىن. ۇلكەن كەڭەستىك ەنتسيكلوپەديادا ولار جايىندا جاعىمسىز پىكىر جازىلعان. ەۆرەيلەردى دە رەپرەسسيالاپ اياۋشىلىق تانىتپادى.
دەسە دە 1947 جىلدىڭ 14 مامىرى بۇۇ-نىڭ باس اسسامبلەياسىندا كسرو-نىڭ بۇۇ-داعى تۇراقتى وكىلى اندرەي گرومىكو «ەۆرەيلەر سوعىس جىلىندا از زۇلىمدىق كورگەن جوق. باتىس ەۋروپا ەلدەرىنەن وللارعا ەشكىم قولداۋ كورسەتپەدى. ەندى مىنە ەۆرەيلەر جەكە مەملەكەت قۇرعىسى كەلەدى. البەتتە، بۇل اقىلعا قونىمدى» دەگەن مالىمدەمە جاسايدى.
ارينە، گرومىكونىڭ بۇل سوزدەرى كرەمل قوجايىنى ستاليننىڭ ۇستانىمى ەكەنى ايتپاسا دا تۇسىنىكتى.
سونىمەن، 1947 جىلدىڭ قاراشا ايىندا بۇۇ بريتانيانىڭ پالەستيناداعى مانداتىن اراب جانە ەۆرەي تەرريتورياسىنا ءبولۋ تۋرالى رەزوليۋتسيا قابىلدايدى. ارينە، مۇنداي شەشىمگە كەلىسپەگەن ارابتار ءبىرىنشى باس كوتەرىپ قولىنا قارۋ الادى. سودان بەرى بۇل سوعىس توقتاعان جوق.
پالەستيناداعى اراب جەرلەرىنىڭ وسى ارالىقتا قانشالىقتى كىشىرەيگەن قاراي سالىڭىز. الپاۋىتتار بۇل تەكەتىرەستى تەك ءوز مۇددەلەرى ءۇشىن عانا پايدالانىپ كەلەدى. بۇل سوعىستىڭ باستى قارۋى يميتاتسيا مەن مانيپۋلياتسيا.
