سىرتقى ىستەر مينيسترلىگى قازاقستاننىڭ پالەستينا-يزرايل قاقتىعىسىنا قاتىستى ۇستانىمىن ءبىلدىردى، دەپ حابارلايدى "ادىرنا" ۇلتتىق پورتالى ءسىم باسپاسوزىنە سىلتەپ.
5 ناۋرىز كۇنى قازاقستان رەسپۋبليكاسى پرەمەر-ءمينيسترىنىڭ ورىنباسارى — سىرتقى ىستەر ءمينيسترى مۇرات نۇرتىلەۋ پالەستيناداعى جاعدايعا ارنالعان يسلام ىنتىماقتاستىعى ۇيىمىنىڭ سىرتقى ىستەر مينيسترلەرى كەڭەسىنىڭ توتەنشە سەسسياسىنا قاتىستى.
سەسسيا جۇمىسىنا يىۇ ەلدەرىنىڭ، ونىڭ ىشىندە ساۋد ارابياسى، كۋۆەيت، كاتار، يوردانيا، يران، تۇركيا، ماروككو سىرتقى ساياسي ۆەدومستۆولارىنىڭ باسشىلارى قاتىستى.
شارا بارىسىندا يىۇ-عا مۇشە مەملەكەتتەر گازا سەكتورىندا اتىستى دەرەۋ توقتاتۋعا شاقىردى جانە پالەستينا-يزرايل داعدارىسىن تەزىرەك شەشۋ قاجەتتىگىن العا تارتتى.
مۇرات نۇرتىلەۋ ءوز سوزىندە گازا سەكتورىنداعى ۇزاققا سوزىلعان گۋمانيتارلىق اپاتقا بايلانىستى ەرەكشە الاڭداۋشىلىق ءبىلدىردى.
"قازاقستان سىرتقى ساياسي ۆەدومستۆوسىنىڭ باسشىسى كوپ جىلعى قاقتىعىستىڭ جالعىز شەشىمى رەتىندە بۇۇ بەكىتكەن «ەكى حالىق ءۇشىن ەكى مەملەكەت» فورمۋلاسى نەگىزىندە 1967 جىلعى شەكارالاردا پالەستينا مەملەكەتىن قۇرۋ بويىنشا قازاقستاننىڭ وزگەرمەيتىن ۇستانىمىن راستادى" دەلىندى سىرتقى ىستەر مينيسترلىگىنىڭ رەسمي جاڭالىقتار كانالىندا.
ءىس-شارا مۇسىلمان ەلدەرىنىڭ پالەستينا حالقىمەن ۇندەستىگىن جانە قاقتىعىستى تەزىرەك توقتاتۋ ءۇشىن بەلسەندى ارەكەت ەتۋگە ۇمتىلىسىن كورسەتتى.
