4 قازان كۇنى قىرعىزستاننىڭ قاۋىپسىزدىك كوميتەتى بىشكەكتە «كوليا قىرعىز» لاقاپ اتىمەن تانىمال قىلمىس الەمىنىڭ سەركەسى قامشى كولباەۆتىڭ ارنايى وپەراتسيا كەزىندە قازا تاپقانىن حابارلاعان بولاتىن. ال بۇگىن قامشى كولباەۆتىڭ دەنەسى جەر قوينىنا تاپسىرىلدى، دەپ حابارلايدى “ادىرنا” ۇلتتىق پورتالى.
شولپان-اتادا وتكەن جەرلەۋ راسىمىنە 500-گە جۋىق ادام جينالدى. ولار مارقۇمعا ارناپ دۇعا وقىدى. ءمايىتتى زيراتقا اپارعان كەزدە 500 ەمەس، بىرنەشە ەسە كوپ – كەم دەگەندە 3 مىڭ ادام جينالعانى بەلگىلى بولدى.
ايتا كەتەيىك، قامشى كولباەۆ ۇلتتىق قاۋىپسىزدىك كوميتەتى قىزمەتكەرلەرىنىڭ تالاپتارىن ەلەمەي، قارۋلى قارسىلىق كورسەتكەن. قارسىلىققا جاۋاپ رەتىندە ارنايى جاساق ساربازدارى وق اتقان.
اتىس كەزىندە قىلمىس الەمىنىڭ سەركەسى قازا تاپتى.
الەۋمەتتىك جەلىدە قاڭتار وقيعاسى كەزىندە ارەكەتسىزدىگى ءۇشىن ايىپتالىپ، سوتتالعان الماتى وبلىستىق پوليتسيا دەپارتامەنتىنىڭ بۇرىنعى باستىعى گەنەرال سەرىك كۇدەباەۆتىڭ ەلدەن قاشىپ كەتۋىنە قامشى كولباەۆ كومەكتەسكەنى تۋرالى دا اقپارات تاراعان. گەنەرالدى كورشى رەسپۋبليكا اۋماعىنا جەتكىزگەن ونىڭ ادامدارى بولعان-مىس. قىرعىزستاننان تۇركياعا دەيىن بارىپ، كەرى قايتىپ، سوتقا تارتىلعان كۇدەباەۆ قازىر جازاسىن وتەپ جاتىر.
قىلمىستىق اۆتوريتەت قامشىبەك اسانبەك قازاقستاندا ترانسۇلتتىق قىلمىستىق ۇيىم قۇردى دەگەن كۇدىككە ىلىنگەن. قىلمىس 2007-2009 جىلدارى جاسالعاندىقتان، ونى قىلمىستىق جاۋاپكەرشىلىككە تارتۋدىڭ مەرزىمى ءوتىپ كەتكەن. وسىعان بايلانىستى قىرعىزستاننىڭ مەملەكەتتىك-ۇلتتىق قاۋىپسىزدىك كوميتەتى قىلمىستىق ءىستىڭ تەرگەۋىن توقتاتتى.
