فوتو: الەۋمەتتىك جەلىدەن
قازاقستاننىڭ ەڭبەك ەرى، حالىق جازۋشىسى، اقىن ءارى قوعام قايراتكەرى مۇحتار شاحانوۆپەن قوشتاسۋ جانە جەرلەۋ راسىمدەرىنىڭ ۋاقىتى مەن ورنى بەلگىلى بولدى.
مارقۇممەن قوشتاسۋ ءراسىمى 21 ءساۋىر كۇنى ساعات 09:00-دە الماتى قالاسىنداعى اباي اتىنداعى قازاق ۇلتتىق وپەرا جانە بالەت تەاترىندا وتەدى. ال جەرلەۋ ءراسىمى سول كۇنى ساعات 11:30-دا الماتىداعى «كەڭساي-2» زيراتىندا ۇيىمداستىرىلادى.
ايتا كەتسەك، بۇعان دەيىن مارقۇمنىڭ جارى حانشايىم شاحانوۆا قازاقستان پرەزيدەنتى قاسىم-جومارت توقاەۆتىڭ اتىنا رەسمي ءوتىنىش جولداعانى حابارلانعان. ءوتىنىش حاتتا مۇحتار شاحانوۆتىڭ سوڭعى اماناتى كورسەتىلگەن - ونى تۇركىستان وڭىرىندەگى وتىرار جەرىندە ورنالاسقان قاسيەتتى ارىستانباب كەسەنەسى ماڭىنا جەرلەۋ.
حاتتا اقىننىڭ قازاق قوعامىنداعى ورنى ەرەكشە ەكەنى ايتىلىپ، ونىڭ جەلتوقسان وقيعاسىنىڭ اقيقاتىن اشۋداعى ەڭبەگى، ۇلتتىق رۋحتى كوتەرۋدەگى قىزمەتى جانە ەل تاۋەلسىزدىگى، ءتىل مەن رۋحانيات جولىنداعى كۇرەسى ەرەكشە اتالىپ وتكەن.
سونداي-اق وتىنىشتە مەملەكەت باسشىسىنان اقىننىڭ سوڭعى اماناتىن ورىنداۋعا رۇقسات بەرۋ جانە جەرلەۋ ءراسىمىن ارىستانباب كەسەنەسى اۋماعىندا زاڭ تالاپتارىنا ساي ۇيىمداستىرۋعا قولداۋ كورسەتۋ سۇرالعان ەدى.
