قاڭتار وقيعاسىنا بايلانىستى سوتتى بولعان الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەباەۆتىڭ ەلدەن قاشىپ كەتكەنى تۋرالى باق بەتتەرىندە اقپارات تارادى، دەپ حابارلايدى “ادىرنا” ۇلتتىق پورتالى.
Tengrinews.kz ءتىلشىسى اقپاراتتىڭ ءمان-جايىن انىقتاۋ ماقساتىندا قۇزىرلى ورگاندارعا حابارلاسقان.
جوعارعى سوتتاعىلار كۇدەباەۆ سوت پروتسەسى ۋاقىتىندا ەلدەن شىقپاۋ تۋرالى قولحاتپەن جۇرگەنىن ايتادى.
ودان بولەك، رەداكتسيا وكىلدەرى قىلمىستىق-تۇزەۋ جۇيەسى كوميتەتىنەن اقپارات سۇرادى. الايدا، ۆەدومستۆو وكىلدەرى بۇل اقپاراتقا قاتىستى جاۋاپ بەرمەگەن.
كەيىن ىشكى ىستەر مينيسترلىگىنە، باس پروكۋراتۋراعا جانە ۇقك شق-نا جۇگىنگەن. الايدا قازىرگى ۋاقىتتا ورگاندار بۇل جاعدايعا رەسمي تۇردە تۇسىنىكتەمە بەرگەن جوق.
سەرىك كۇدەباەۆتىڭ شەتەلگە قاشىپ كەتكەنى تۋرالى اقپاراتتى Nege.kz رەداكتسياسى دا حابارلادى. باسىلىم مالىمەتىنشە، كۇدەباەۆ قىرعىزستان ارقىلى وزبەكستانعا ءوتىپ، ارى قاراي چارتەر ارقىلى سولتۇستىك كيپرگە كەتىپ قالعان.
“الماتى وبلىسى پوليتسيا دەپارتامەنتىنىڭ بۇرىنعى باستىعى سەرىك قۇدەباەۆ قاڭتار ايىنداعى وقيعالار بويىنشا ەلدەن قاشىپ كەتتى. وعان ءبىر اي بۇرىن سوت ۇكىمى شىعۋى كەرەك ەدى، بىراق سوت قانداي دا ءبىر سەبەپتەرمەن كەيىنگە قالدىرىلدى. كۇدەباەۆ اۋرۋحاناعا جاتتى”، – دەپ جازىلعان حابارلامادا.
دەرەككوز مالىمەت بويىنشا، كۇدەباەۆتىڭ وسىنداي مازمۇندا قاشۋعا دايىندالۋى مۇمكىن. ويتكەنى ول قىرعىزستانمەن شەكارادان كەدەرگىسىز ءوتىپ، سول جەردەن وزبەكستانعا، كەيىن چارتەرلىك رەيسپەن قازاقستاننىڭ ەكستراديتسيالاۋ تۋرالى كەلىسىمى جوق سولتۇستىك كيپرگە ۇشىپ كەتۋى مۇمكىن.
ايتا كەتەيىك، كەشە سوتتالۋشىنىڭ سوت وتىرىسىنا كەلمەۋىنە بايلانىستى سوتتالۋشىنىڭ دالەلدى سەبەپتەرىن راستايتىن مالىمەتتەر جوق ەكەنى ايتىلدى.
“سوعان بايلانىستى قىلمىستىق ءىس جۇرگىزۋ كودەكسىنىڭ 157 جانە 335-باپتارىنا سايكەس سوت كۇدەباەۆتى كورسەتىلگەن ۋاقىتقا ماجبۇرلەپ اكەلۋ تۋرالى قاۋلى شىعاردى”، – دەلىنگەن سوت حابارلاماسىندا.
ەسكە سالايىق، سەرىك كۇدەباەۆ بىلتىر ءساۋىردىڭ اياعىندا ءوز ەركىمەن قىزمەتىنەن بوساتىلدى. ال مامىردا ول قاڭتار وقيعاسى بويىنشا كۇدىكتى دەپ تانىلدى.
بۇعان دەيىن پوليتسيا گەنەرال-مايورى سەرىك كۇدەباەۆ "بيلىكتى نەمەسە لاۋازىمدىق وكىلەتتىگىن اسىرا پايدالانعانى ءۇشىن" ورتاشا قاۋىپسىزدىك كولونياسىندا توعىز جىلعا دەيىن باس بوستاندىعىنان ايىرىلۋى مۇمكىن ەكەنى ايتىلدى.
10 ناۋرىزدا الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەباەۆ اۋرۋحاناعا تۇسكەن بولاتىن. ال وعان قاتىستى ۇكىم 10 ناۋرىزدا شىعۋى كەرەك ەدى. الايدا بۇرىنعى پوليتسيا باسشىسىنا قاتىستى سوت وتىرىسى بەلگىسىز مەرزىمگە شەگەرىلدى. 27 ناۋرىزدا كۇدەباەۆقا قاتىستى سوت وتىرىسى ءتورتىنشى رەت شەگەرىلدى. ارتىنشا 20 ناۋرىزدا سەرىك كۇدەباەۆ سوتقا ءماجبۇرلى تۇردە جەتكىزىلەتىنى بەلگىلى بولدى.
