الماتى وبلىسى پوليتسيا دەپارتامەنتىنىڭ بۇرىنعى باسشىسى، گەنەرال سەرىك كۇدەباەۆ مەملەكەتتىك شەكارانى زاڭسىز كەسىپ وتكەنى ءۇشىن جاۋاپقا تارتىلادى. بۇل رەتتە ونىڭ ەلدەن قالاي كەتكەنى ناقتى بەلگىلى بولدى، - دەپ حابارلايدى "ادىرنا" ءتىلشىسى.
ماجىلىستە باس پروكۋروردىڭ ورىنباسارى جاندوس ومىراليەۆتىڭ مالىمدەۋىنشە، كۇدەباەۆتىڭ سوزىنە قاراعاندا، ول شەكارا بەكەتىنەن تىس شەكارا قورشاۋىنىڭ استىنا ءوتىپ، ءوز بەتىنشە شەكارادان ءوتىپ كەتكەن.
«بۇل الماتى وبلىسىنىڭ كەگەن اۋدانىندا بولدى»، - دەپ ناقتىلادى باس پروكۋروردىڭ ورىنباسارى.
سونداي-اق كۇدەباەۆتى شەكاراعا كولىكپەن جەتكىزگەنى بەلگىلى بولدى، بىراق ونىڭ جوسپارىن بىلمەگەندىكتەن جۇرگىزۋشى جاۋاپكەرشىلىككە تارتىلمايدى.
ەسكە سالايىق، ناۋرىز ايىنىڭ باسىندا سەرىك كۇدەباەۆ اۋرۋحاناعا ءتۇسىپ، سوڭعى ءسوزىن ايتۋ ءۇشىن سوتقا كەلمەدى. كەيىن بۇل پروتسەسس بىرنەشە رەت كەيىنگە شەگەرىلدى. ايتا كەتەيىك، پروكۋرورلار وعان «بيلىك پەن وكىلەتتىكتى اسىرا پايدالاندى» دەگەن ايىپپەن 9 جىل باس بوستاندىعىنان ايىرۋدى سۇراعان بولاتىن.
وتكەن جىلدىڭ ءساۋىر ايىنىڭ سوڭىندا سەرىك كۇدەباەۆ ءوز وتىنىشىمەن الماتى وبلىستىق پوليتسيا دەپارتامەنتىنىڭ باسشىسى قىزمەتىنەن بوساتىلعان بولاتىن. سول جىلدىڭ مامىر ايىندا ول قاڭتار وقيعاسى بويىنشا كۇدىكتى دەپ تانىلدى. ۇستىمىزدەگى جىلدىڭ قاڭتار ايىنىڭ باسىندا كۇدەباەۆقا قاتىستى سوت وتىرىسى ءوتتى. كەيىن كۇدەباەۆتىڭ شەتەلگە قاشىپ كەتكەنى بەلگىلى بولدى.
"ادىرنا" ۇلتتىق پورتالى
ۇقساس جاڭالىقتار
