2023 جىلدىڭ 5 قىركۇيەگى كۇنى ادىرنا ۇلتتىق پورتالىندا "اتىراۋ اكىمدىگى ءدىن ىسىندە نەگە زايىرلىلىق تانىتپايدى؟" دەگەن ماقالا جاريالاندى. سول ماقالادا كونستيتۋتسيامىز بويىنشا مەملەكەتىمىزدىڭ ەشقانداي دىنگە باسىمدىق بەرمەيتىنى، سوعان قاراماي اتىراۋ وبلىسى ءدىن ىستەرى باسقارماسى نەگىزگى مىندەتىنەن اۋىتقىپ، «ازان» اتتى ءدىني باعىتتاعى راديو اشقالى جاتقانى تۋرالى ءسوز بولعان ەدى. ادىرنا پورتالى سول ماتەريالدى دايىنداۋ بارىسىندا تۋىنداعان ساۋالداردى ءدىن ىستەرى باسقارماسىنا جولداعان بولاتىن. ولاردان الەۋمەتتىك جەلىگە سىلتەگەن جاۋاپ كەلدى، دەپ حابارلايدى «ادىرنا» ۇلتتىق پورتالى.
«ادىرنا» ۇلتتىق پورتالىنىڭ ساۋالدارى مىنانداي بولعان:
1. كونستيتۋتسيادا مەملەكەتىمىزدىڭ ەشقانداي دىنگە باسىمدىق بەرمەيتىنى تايعا تاڭبا باسقانداي جازىلعان. مەملەكەتتىك مەكەمەنىڭ قارجىلاندىرۋىمەن "Aزان" اتتى يسلام ءدىني نەگىزىندەگى ينتەرنەت-راديو اشۋ سول اتا-زاڭدا كورسەتىلگەن زايىرلىلىق تالاپتارىن بۇزۋ ەمەس پە؟
2. مەملەكەتتىڭ الەۋمەتتىك تاپسىرىس اياسىندا ءدىن ناسيحاتتايتىن راديونى قارجىلاندىرۋى قانشالىقتى زاڭدى؟
3. جات ءدىني اعىم يدەولوگياسىنا قارسى يممۋنيتەت قالىپتاستىرۋ ءۇشىن بۇقارالىق اقپارات قۇرالىن اشىپ، ءدىن مەن ءداستۇردى ساباقتاستىرا ناسيحاتتاۋ باسقارمانىڭ قۇزىرەتىنە كىرە مە؟
4. "ازان" دەگەن ءدىني راسىمگە، اتاپ ايتقاندا مۇسىلماندىققا عانا قاتىستى ءسوز. مۇسىلماندار نامازعا جاماعاتتى شاقىرۋ ءۇشىن ازان ايتادى. دەمەك وسى ءبىر راديوعا اتاۋ بولعان ءدىني سوزدەن-اق وبلىستىق ءدىن ىستەرى باسقارماسىنىڭ مەملەكەتتىك زايىرلىلىق ۇستانىمىن اياق استى ەتىپ وتىرعان جوق پا؟
ءتورت ساۋالعا دا زاڭدىق نەگىزگە سۇيەنىپ، جاۋاپ جازىلۋى كەرەك ەدى. ال، ءدىن ىستەرى باسقارماسى باسشىسى ق.كوشقاليەۆ بولسا، رەسمي جاۋابىندا الەۋمەتتىك جەلىگە سىلتەگەن.
"اتىراۋ وبلىسى ءدىن ىستەرى باسقارماسى 2023 جىلعى 22 قىركۇيەكتەگى №زت-2023-01861504 ءوتىنىشىڭىزدى قاراپ، ءدىن باسقارماسىنىڭ جۇرگىزىپ وتىرعان جۇمىستارىنا بايلانىستى تۋىنداعان ماسەلەلەردىڭ جاۋابىن ءبىزدىڭ الەۋمەتتىك جەلىلەردەگى پاراقشالارىمىزدان قاراپ، جالپى ماعلۇمات الۋعا بولاتىنىن حابارلايدى. سونىمەن قاتار، جاڭادان اشىلعان راديونىڭ ماقساتىن «ازان اتىراۋ» راديوسىنىڭ azan_radiosy ينستاگرام پاراقشاسى ارقىلى راديونىڭ بارلىق باعدارلاماسىمەن تانىسۋعا بولاتىنىن قاپەرلەرىڭىزگە سالامىز" دەپ جاۋاپ قاتقان.
ال جەلىدەگى پاراقشالارىنان سۇراقتارعا لايىقتى جاۋاپ تابا المادىق.
جوعارىداعى زاڭدىق تۇرعىداعى ساۋالدارعا الەۋمەتتىك جەلى مەن راديونىڭ باعدارلامالارى جاۋاپ بەرە الا ما؟ سوندا كوشقاليەۆ سۇراۋ سالعانداردىڭ بارىنە "الەۋمەتتىك جەلىدەن وقي سالىڭىز" دەي مە؟ مەملەكەتتىك قىزمەتكەر ناقتى سۇراققا ناقتى جاۋاپ بەرۋى كەرەك ەمەس پە؟
جات ءدىني اعىممەن كۇرەسىپ، زارارلى ءدىني توپتاردى زاڭ اياسىندا اۋىزدىقتاۋعا مىندەتتى مەمقىزمەتكەردىڭ مىندەتىن الەۋمەتتىك جەلى اتقارار بولسا، كوشقاليەۆتىڭ قاجەتى قانشا؟
قانات بىرلىكۇلى «ادىرنا» ۇلتتىق پورتالى
