سەرىكزات دۇيسەنعازى ۇلىنا قانداي ات قويعانىن ايتتى

«تۇنەۋگۇنى تۇسىمە ءاليحان باتىرىم كىردى. اكەلەپ كەلىپ قۇشاقتاپ جاتىر. قۇشاعى ىپ-ىستىق ەكەن. مەن بىردەڭە دەپ ۇلگەرگەنىمشە اسىعىپ قايتا كەتتى دە قالدى. ويانىپ كەتتىم دە، اللا تاعالانىڭ ءبىر جاقسىلىعى بولار دەپ ىشتەي وزىمشە جورىدىم. قۇدايدىڭ قۇدىرەتى شەكسىز عوي. ءسابيىمىز دۇنيەگە كەلگەنشە ەشكىمگە جاريالاماۋعا تىرىستىم. ازىن-اۋلاق اعايىن عانا ءبىلدى. قۇرساققا بىتكەنىن اۋىرىپ جاتقان مارقۇم انام ەستىپ قاتتى قۋاندى. بالاپانىمنىڭ دۇنيەگە كەلۋىنە بارشا قازاق حالقى تىلەكشى بولدى. ول جارىق ءومىردىڭ ەسىگىن حالىقتىڭ بالاسى بولىپ اشتى. ءۇشىنشى قازان كۇنى قازاق دالاسى شاتتىقتان ءدۇر سىلكىندى. ءاليحانىم ومىردەن وتكەن كۇننەن تۋرا ون اي وتكەندە (ەكىنشى قاڭتاردا دۇنيە سالدى) جاراتقاننىڭ شەبەرلىگىمەن ​ ءىزباسارى تۋدى. سول ءۇشىن اللاعا سانسىز شۇكىرلىكتەر ايتامىن! "بالانىڭ اتىن كىم دەپ قويدىڭدار؟" دەگەن سۇراق تولاسسىز كەلىپ جاتىر. ءاليحانىمنىڭ ەسىمىن اكادەميك رىمعالي نۇرعالي، ايارۋىمنىڭ ەسىمىن اكادەميك سەيىت قاسقاباسوۆ قويعان بولاتىن. مەنىڭ ۇلى ۇستازدارىم عوي. سول ءۇردىستى ۇزبەيىن دەپ ءوزىم ەرەكشە قۇرمەتتەيتىن اقىلشى اعام، ءارى قۇدايى كورشىم، الاشتانۋشى-اكادەميك ديحان قامزابەكۇلى اعامەن اقىلداستىم. ء"اليحاننىڭ ءىنىسى ءالىمحان بولعانى دۇرىس. بۇل ەسىمنىڭ ماعىناسى دا، تاريحي ماڭىزى دا تەرەڭ" دەگەن ديحان اعامنىڭ سالماقتى سوزىنە توقتادىم. بىراق ونى ەشكىمگە ايتقان جوق بولاتىنمىن. سودان الىپ-ۇشىپ جۇمىسقا بارسام دەكانات ءماجىلىسى باستالىپ جاتىر ەكەن. دەكانىمىز قايرات ساق اعا جينالىس ۇستىندە «اتىن قويساڭدار ءالىمحان دەپ قويىڭدار. ءاليحاننىڭ ءىنىسى عوي» دەپ قالدى. قايرات اعانىڭ ءدوپ تۇسكەنىنە ءسال جىميىدىم دا، ء"يا، ديحان اعامەن اقىلداسىپ سول ەسىمدى قويدىق» دەدىم. سونىمەن حالىقتىڭ باتاسىمەن تۋعان بالاپانعا الاش قايراتكەرى، پروفەسسور ءالىمحان ەرمەكوۆتىڭ قۇرمەتىنە ءالىمحان دەگەن كوركەم ەسىم قويىلدى. اتىن دۋالى اۋزىمەن قويعان الاش ادەبيەتى مەن تاريحىن زەرتتەۋشى، اكادەميك ديحان قامزابەكۇلى! قولداعان ءبىزدىڭ جۋرناليستيكا جانە ساياساتتانۋ فاكۋلتەتىنىڭ دەكانات ءماجىلىسى! باتاسىن بەرىپ، پروتوكولىنان وتكىزگەن سەكسەننىڭ سەڭگىرىندەگى اكەم ماقسۇت دۇيسەنعازىۇلى! بارشا قازاق حالقىنا قۇتتى بولسىن ايتامىن! ءالىمحان باتىردىڭ باۋى بەرىك بولسىن! اللا ءتىل-كوزدەن ساقتاپ، جامبىلدىڭ جاسىنا جەتسىن! بارشا تىلەكتەستەرگە مىڭ العىس!»—دەدى ول.