بەلگىلى اقىن سەرىكزات دۇيسەنعازى ۇلىنىڭ قازاسىنا قاتىستى سوت شەشىمى شىقتى. 12 مامىر كۇنى اقمولا وبلىستىق سوتى قاۋىپسىزدىك ەرەجەلەرىنىڭ ساقتالماۋى سالدارىنان دەمالۋشى قازا بولعان «ەلىكتى» تاۋ شاڭعىسى بازاسىنىڭ باسشىسىن 4 جىلعا باس بوستاندىعىنان ايىردى، دەپ حابارلايدى «ادىرنا» ءتىلشىسى.
سوتتا ءجاسوسپىرىمنىڭ تراسساعا نۇسقاۋسىز جانە قاۋىپسىزدىك ەرەجەلەرىن ءتۇسىندىرۋسىز شىعارىلعانى، وندا قوزعالىس بەلگىلەرى، قورعانىس تورلارى، ەسكەرتۋ بەلگىلەرى، قورعانىس توسەنىشتەرى، اعاشتاردىڭ الدىنداعى قورشاۋلار بولماعانى انىقتالدى. سونىمەن بىرگە، شاڭعى بازاسىندا مەديتسينالىق پەرسونال، كۇتپەگەن جاعدايلار تۋىنداعان كەزدە ءىس-قيمىل الگوريتمى، تاۋ شاڭعىسى تراسساسى مەن اسپالى جولدى پايدالانۋعا رۇقسات بەرۋ قۇجاتتارى جوق بولىپ شىقتى.
جازا تاعايىنداۋ كەزىندە سوت سوتتالۋشىنىڭ جاس بالاسىنىڭ بولۋىن ەسكەرىپ، قىلمىستىق جاۋاپكەرشىلىكتى جەڭىلدەتكەن.
«زەرەندى اۋداندىق سوتىنىڭ ۇكىمىمەن تاۋ شاڭعىسى بازاسىنىڭ ديرەكتورىنا قىزمەت كورسەتۋ سالاسىندا 3 جىلعا اينالىسۋ قۇقىعىنان ايىرا وتىرىپ، 4 جىلعا باس بوستاندىعىنان ايىرۋ جازاسى تاعايىندالدى»، - دەدى ۆەدومستۆودان.
بۇدان بولەك، سوتتالۋشىدان جاپا شەككەن ەكى ادامنىڭ پايداسىنا ارقايسىسىنا 10 000 000تەڭگەدەن، قايتىس بولعان ادامنىڭ پايداسىنا-3 000 000 تەڭگەدەن مورالدىق زيان، كەلتىرىلگەن ماتەريالدىق زالال ءوندىرىلىپ الدى. سوت اكتىسى زاڭدى كۇشىنە ەنگەن جوق.
ەسكە سالايىق، بىلتىر 2 قاڭتاردا «ەلىكتى» تاۋ شاڭعى بازاسىندا سەرىكزات دۇيسەنعازىنى 16 جاستاعى ۇلى ءاليحان اعاشقا سوعىلىپ، كوز جۇمعان ەدى.
