ىشكى ىستەر ءمينيسترىنىڭ ورىنباسارى مارات قوجاەۆ بەلسەندى دياس قۇزايىروۆ، ءادىلجان ابدىعاليەۆ پەن ءادىل يۋسۋپوۆتىڭ ۇستىنەن قوزعالعان ءىس بويىنشا سۇراققا جاۋاپ بەردى. بۇعان دەيىن ءۇش بەلسەندى ريددەردە مەملەكەتتىك قىزمەتشىلەردەن مەملەكەتتىك تىلدە سويلەۋدى تالاپ ەتكەنى ءۇشىن ءىستى بولعانى ايتىلعان، دەپ حابارلايدى «ادىرنا» ۇلتتىق پورتالى Ulysmedia.kz سايتىنا سىلتەمە جاساپ.
ۆيتسە-مينيستر:
«دياس قۇزايىروۆ – ول ازاماتتىڭ اتى-ءجونى. شىنىمەن، ولار ريددەرگە بارعان. وتكىزگەن ءىس-شارالارى بويىنشا، قىلمىستىق ءىس تىركەلدى. ول قىلمىستىق ءىستى تىركەۋدىڭ سەبەبى – سول جەردەگى ازاماتتاردىڭ ارىزى. «قۇقىقتارى بۇزىلدى» دەپ وتىرعان ازاماتتاردىڭ ارىزى بويىنشا قوزعالعان ءىس. ءالى تەرگەلىپ جاتىر. ول ءىس بويىنشا ارنايى فيلولوگيالىق، باسقا دا ساراپتامالار تاعايىندالدى. قازىر سول ساراپتامالاردىڭ الدىن الا تەرگەۋدىڭ ناتيجەسى بويىنشا شەشىم قابىلدانادى. كىنالەرى دالەلدەنسە، انىقتالسا، وندا جاۋاپكەرشىلىككە تارتامىز»، – دەيدى ول.
مارات قوجاەۆ قازىرگى ۋاقىتتا دياس قۇزايىروۆتىڭ بوستاندىقتا ەكەنىن ايتتى. ءىس تەرگەۋشىنىڭ قاراۋىندا دەيدى.
«ال مەملەكەتتىك قىزمەتكەرلەردەن مەملەكەتتىك تىلدە سويلەۋدى تالاپ ەتكەنى ءۇشىن ءىس قوزعاۋ قانشالىقتى زاڭدى؟ بۇلاي ءىستى قوزعاۋدىڭ ءوزى نونسەنس دەپ ەسەپتەمەيمىز بە» دەگەن سۇراققا ۆيتسە-مينيستر بىلاي دەيدى.
«مەن ولاي ەسەپتەمەيمىن. تالاپ ءارتۇرلى بولادى. كەيبىر نارسەلەر ورىسشا ايتقاندا «مانەراسىنا» بايلانىستى. قانداي دا ءبىر ىستەردى كوتەرىپ، قانداي ادامداردىڭ قۇقىقتارىن بۇزعانىنا بايلانىستى (...) ريددەردەگى ازاماتتار وزدەرىنىڭ «قۇقىعى بۇزىلدى» دەپ ساناپ وتىر. ءىس بارىسىندا انىقتالادى»، – دەيدى ول.
سونىمەن قاتار «ياعني كەز كەلگەن ازامات مەملەكەتتىك ورگانعا بارىپ، قازاق ءتىلىن تالاپ ەتسە، ول قىلمىستىق قۋدالاۋعا ۇشىراي ما؟» دەگەن سۇراققا ءشارىپحانوۆ بىلاي دەپ جاۋاپ بەردى.
«تاعى دا ايتايىن: تالاپتىڭ ءار ءتۇرى بولادى. ونى قانداي تۇردە، قاي زاڭنىڭ شەڭبەرىندە، قاي ءوزىنىڭ سۇراقتارىن قاي مانەرا جاسايتىنىنا دا بايلانىستى شىعار. سول سەبەپتەن «زاڭدى قۇقىقتتارىمىز بۇزىلدى» دەگەن ازاماتتاردىڭ ارىزى نەگىزىندە ءىس قوزعالىپ وتىر»، – دەيدى ول.
«ادىرنا» ۇلتتىق پورتالى
