الماتى قالاسىندا ورالاسقان "دينارا" كافەسىنە قاتىستى شۋ شىققانى بەلگىلى. كەيىن قازاقشا ءمازىر سۇراعاندارعا "ناتسيست، ءفاشيستسىڭ" دەگەن قىزمەتكەر ميىعىنان كۇلىپ وتىرىپ، كەشىرىم سۇراعان بولدى. شىندىعىندا، كەشىرىم سۇراماپتى. قازاقتارعا دورەكىلىك ءالى جالعاسىپ جاتىر. بۇل جايدى جۋرناليست بەللا ورىنبەتوۆا كەڭىنەن جازدى. اۆتوردىڭ ايتۋىنشا، كافەگە بارعان قازاقتارعا دورەكىلىك ءالى كورسەتىلىپ جاتىر، دەپ حابارلايدى "ادىرنا" ۇلتتىق پورتالى.
جۋرناليست بەللا ورىنبەتوۆا قازاق ءتىلىنىڭ قىسىم كورگەنىنە قاتىستى كەڭىنەن جازدى:
- جاعدايدىڭ قالاي بولعانىن قىسقاشا ايتىپ وتەيىن... Aigerim Kussaiynkyzy, Kamila Muller, اينۇر سادىرباي جانە تاعى بىرنەشە ادام دينارا كافەسىنە بارادى. قازاقشا ءمازىر سۇراعانى ءۇشىن ادمينيستراتورى فاشيستەر، ناتسيستەر، كەتىڭدەر ايتپەسە قازىر پوليتسيا شاقىرامىن دەپ قورقىتادى. ءسويتىپ بىرنەشە مينۋتتان سوڭ قارۋ اسىنعان كۇزەت قىزمەتى (گبر جەكە كۇزەت قىزمەتى) كەلەدى. كافە اكىمشىلىگى ءبىر توپ ادام شۋ شىعارىپ، ماڭىزدى، قادىرلى قوناقتاردىڭ شىرقىن بۇزدى دەگەن ەكەن. كافە قىزمەتكەرلەرىنىڭ بۇل ارەكەتى ايگەرىمدەردى ودان ءارى اشۋلاندىرادى. ولار وزدەرىنىڭ تۇتىنۋشى، قازاقستان ازاماتى قۇقىعىنىڭ بۇزىلعانىنا بايلانىستى المالى اۋدانىنىڭ ۋچاسكەلىك پوليتسياسىن شاقىرادى. پوليتسيا كەلگەن سوڭ قر قىلمىستىق كودەكسiنىڭ 174-بابىنداعى الەۋمەتتiك، ۇلتتىق، رۋلىق، ناسiلدiك، تەكتىك-توپتىق نەمەسە دiني الاۋىزدىقتى قوزدىرۋ فاكتىسى بويىنشا ارىز جازىپ، قىلمىستىق ءىس قوزعايىن سۇرايدى.
دەگەنمەن قازاق تىلىنە كۇل شاشىپ جاتقاندا قۇقىق قورعاۋ ورگانداعى "قاعاناعى قارىق، ساعاناعى سارىق" بولىپ وتىرا بەرەدى. جۋرناليست بۇعان قاتىستى بۇلاي دەيدى:
- الايدا كەيىن 6 كۇنى پوليتسيا دەپارتامەنتىنەن حات كەلىپ، قىلمىستىق ءىس قوزعاۋعا نەگىز جوق دەيدى. ياعني پوليتسيا "فاشيست، ناتسيست" سوزدەرىنەن ەش قورلىق كورمەگەن، قىلمىستىق قۇرام جوق دەپ تانىعان. 6 اقپان كۇنى اينۇر سادىرباەۆا قر قىلمىستىق كودەكسىنىڭ 145-بابى ادامنىڭ جانە ازاماتتىڭ تەڭ قۇقىقتىلىعىن بۇزۋ بويىنشا تاعى دا پوليتسيا دەپارتامەنتىنە ارىز جازادى. جاۋاپ كوپ كۇتتىرمەيدى. تاعى دا قىلمىستىق ءىس قوزعاۋعا نەگىز جوق.قازاق تىلىندە قىزمەت كورسەتۋىن سۇراعان بەلسەندىلەرگە، قىلمىستىق ەمەس، اكىمشىلىك ءىس بويىنشا شاعىم جازا الاسىزدار دەگەن ەكەن پوليتسيا دەپارتامەنتىندە. قازاق تىلىندە قىزمەت كورسەتپەگەن، كونستيتۋتسيالىق قۇقىن تالاپ ەتكەندەردى فاشيست دەپ قورلاعاندار نەگە جازاسىز قالۋى كەرەك؟ وقيعا بولعان كۇنى 2GIS –تە ەلۋدەن استام ادام دينارا كافەسىنە قاتىستى نەگاتيۆ پىكىرىن جازدى، ءتىپتى كورشى ۇستەلدە وتىرعان ورىس كەلىنشەك تە جاعدايدى ءوز كوزىمەن كورىپ، ادامداردى ديسكريميناتسيالايتىن كافەگە ەندى كەلمەيمىن پىكىر قالدىرعان ەكەن. 2GIS مودەراتورلارى تىپ-تيپىل ەتىپتى. بۇل جاعدايدا قوعامداعى ادىلەت، ءتارتىپ، زاڭنىڭ كەپىلى بولاتىن ورگاندار ءمىز باقپاسا، قوعام بولىپ بۇل جاعدايدىڭ قايتالانباۋىنا ىقپال ەتۋىمىز كەرەك.
ءسوز سوڭىندا اۆتور بۇگىنگى "دينارانىڭ" كەشەگى "دينارا" كافەسىنىڭ ۇستانىمىنان سىنىق سۇيەم العا باسپاعانىن، قازاققا دورەكىلىك تانىتۋىن جالعاستىرىپ جاتقانىن جازادى. كەشىرىم سۇراعانىن كوزبوياۋشى جالعاندىققا بالاپ:
- وقيعا بولعان سوڭ كافە ادمينيستراتورىنىڭ كەشىرىم سۇراعان ۆيدەوسى (كىمنەن سۇراعانى بەلگىسىز، كافەنىڭ قۇرمەتتى قوناقتارى ما، الدە ءوزى بالاعاتتاعان ادامداردان با تۇسىنىكسىز) تارادى. الايدا "دينارا" كافەسىنە بارىپ جاتقان تانىستارىمىز قازاقشا ءمازىردىڭ ءالى جوق ەكەنىن، قازاقشا ءمازىر سۇراعاندا قىزمەتكەرلەر دورەكى جاۋاپ بەرىپ جاتقانىن ايتادى، - دەدى بەللا ورىنبەتوۆا.
"ادىرنا" ۇلتتىق پورتالى
