كەشە الماتىدا قارت جاۋىنگەر، ەكىنشى دۇنيەجۇزىلىك سوعىس ارداگەرىمەن 28 پانفيلوۆشىلار پاركىندە سويلەسىپ قالدىم.
قازاق. قاپتاعان ادام. قالىڭ شەرۋ. كوبى كەكتەنگەن كوزبەن وتكەنگە قارايدى. قولدارىنا اتالارىنىڭ، سوعىستا باياعىدا قازا بولىپ، سۇيەگى قۋراپ قالعان جاقىندارىنىڭ سۋرەتتەرىن ۇستاپ العان. "فاشيست، فاشيستەر قۇرىسىن!" دەپ داۋرىقتى اتامىز. ءۇستى-باسى تولعان وردەن، ماداق، سولكەباي. اڭگىمەگە تارتتىم.
– اتا، مەرەكەڭىز قۇتتى بولسىن!
– راحمەت!
– بۇگىن ادام بىلتىرعىدان از ەكەن. بىلتىر 100 مىڭ ادام قاتىسىپ ەدى شەرۋگە.
– جاستار بىلمەيدى. مىنا كۇندى بىزدەر - سوعىسقا قاتىسۋشىلار قانىمىزبەن قورعادىق. تاۋەلسىزدىك ءبىزدىڭ ارقامىزدا كەلدى.
– قالاي؟ تاۋەلسىزدىكتى ءبىز ورىستاردان ازەر الدىق قوي.
– ورىستاردان! (اتامىزدىڭ داۋسى دىرىلدەپ، قاتقىل شىقتى. وشكىن كوزدەرىمەن ماعان ىزبارلانا قارادى). سەندەر نە بىلەسىڭدەر؟! ورىستاردىڭ، جالپى رەسەيدىڭ تۇك جازىعى جوق. ءبىزدى ادام قىلعان سولار. اباي اتاڭ دا ايتقان سولاي دەپ.
– ول كىسى نە دەپتى؟
– ورىستان ۇيرەنىڭدەر، وقىڭدار، قاڭعىرىپ جۇرمەڭدەر دەگەن. سەن ونى دا وقىماعانسىڭ عوي، يا؟!
– وقىعام. بىراق ءدال سولاي ايتپاعان سەكىلدى.
– قايتالاپ وقى. ورىستار بولماعاندا، ءبىز ءالى دە تاۋ-تاستا كوشىپ-قونىپ جۇرەر ەك.
– قويىڭىز. قالاي؟
– قالايى نەسى؟ مال باعىپ.
– قاي ەلدە سوعىستىڭىز؟
– پولشادا.
– قالاي جەڭدىڭىزدەر؟
– ءبارى ۇلى ءستاليننىڭ ارقاسى.
– ول نە ىستەدى؟
– ەگەر ونىڭ كورەگەندىگى بولماسا، مىنا ءبىز وسى جەردە تۇرماس ەدىك.
– ول نە كورەگەندىك ىستەدى؟
– قورىقپادى. سوعىستى. ءبىز سوعىستا ولۋدەن ەمەس، ءستاليننىڭ الدىندا ۇياتتى بولماس ءۇشىن قان كەشتىك.
– ستالين دە گيتلەر سەكىلدى تيران عوي...
– نە دەيسىڭ؟! ءۇي، نادان! مەن سەنى ادام ەكەن دەسەم. ستالين - قازاقتاردىڭ قامقورشىسى. ەگەر ستالين جاۋىز بولسا، ونىڭ سۋرەتىن كوتەرىپ نەگە شىعادى مىنا حالىق؟ ول تيران ەمەس، ناعىز كورەگەن باسشى. بۇگىنگى نازارباەۆىڭ دا، ءپۋتينىڭ دە، انا ترامپىڭ دا ونىڭ الدىندا تۇك ەمەس، جاي قۋىرشاقتار. مىنە، كوردىڭ بە، ەگەر ستالين بولماسا، وسىنداي باقىتتى كۇن بولار ما ەدى؟ ولار مويىنداعاننان، وعان تاعزىم ەتىپ، پورترەتىنە ءمىناجات قىلىپ ءجۇر. قازاقستان مەن رەسەيدى ءستاليننىڭ رۋحى - ايباتى قورعاپ تۇر. ايتپەسە، باياعىدا جاۋلارىمىز تۇنشىقتىرار ەدى.
– ول قازاقتاردى قىناداي قىردى عوي؟
– كىمدى قىردى؟ قازاقتار وزدەرى قىرىلدى. اشتان. بالىق جەۋدى بىلمەدى. ناداندىق. ال جاۋلاردى اياماعانى دۇرىس بولدى. قازىر دە جاۋلار كوپ. ءبىرىڭ امەريكاشىل، ءبىرىڭ ءدىندار بوپ... امەريكا - وسى سەندەرگە نە جاقسىلىق ىستەدى؟ قازاقتىڭ بولاشاعى جوق...
اتام وسىنى ايتتى دا، تاياعىن تىقىلداتىپ، مەنى يتەرە ءجۇرىپ كەتتى.
ستالين - ءتىرى! ستالين ولگەن جوق! الماتىدا 2018 جىلى 100 مىڭنان اسا ادام، 2019 جىلى ون مىڭداعان ادام "ماڭگىلىك پولك" شەرۋىنە قاتىستى. ستالين - ءتىرى!..
ارمان دۇيسەنحان
