بۇگىن - دەتەكتيۆ جانرىندا قالام تەربەگەن قازاقتىڭ تۇڭعىش جازۋشىسى كەمەل توقاەۆتىڭ تۋعانىنا 100 جىل.
قازاق مادەنيەتى مەن ادەبيەتىنە سۇبەلى ۇلەس قوسقان قارىمدى قالامگەر 1923 جىلى 2 قازاندا قازىرگى جەتىسۋ وبلىسى، قاراتال اۋدانىندا دۇنيەگە كەلگەن.
ول ۇلى وتان سوعىسىنىڭ ارداگەرى. 1948 جىلى قازاق مەملەكەتتىك ۋنيۆەرسيتەتىن بىتىرگەن. «لەنينشىل جاس» (قازىرگى «جاس الاش»), «قازاقستان پيونەرى» (قازىرگى «ۇلان»), «سوتسياليستىك قازاقستان» (قازىرگى «ەگەمەن قازاقستان») گازەتتەرى رەداكتسيالارىندا جاۋاپتى قىزمەتتەر اتقارعان.
1960–1977 جج. قازاق كسر جوعارعى كەڭەسى «ۆەدوموستارىنىڭ» باس رەداكتورى بوپ ىستەگەن، 1980–1984 جج. قازاقستان جازۋشىلار وداعىنىڭ ادەبي كەڭەسشىسى بولعان.
كەڭەس چەكيستەرى تاقىرىبىنا ارنالعان وننان استام كىتابى قازاق جانە ورىس تىلدەرىندە باسىلىپ شىقتى. قازاقستان جازۋشىلار وداعى مەن قازاق كسر ىشكى ىستەر مينيسترلىگى جاريالاعان ادەبي بايگەلەردە ءبىرىنشى بايگە الىپ، ءتورت مارتە لاۋرەات اتاندى (1956, 1972, 1977, 1980). «قىزىل كوميسسار»، «قىلمىسكەر كىم؟» جانە «سيقىرلى سىرلار» دەپ اتالاتىن پەسالاردىڭ دا اۆتورى.
ۇلى وتان سوعىسىنىڭ ءى جانە ءىى دارەجەلى وردەندەرىمەن، ەكى مارتە «ەرلىگى ءۇشىن» مەدالىمەن جانە باسقا كوپتەگەن مەدالدارمەن، قازاق كسر جوعارعى كەڭەسىنىڭ قۇرمەت گراموتالارىمەن، كسرو ىشكى ىستەر مينيسترلىگىنىڭ قۇرمەت گراموتاسىمەن جانە ومىراۋعا تاعاتىن ارناۋلى بەلگىسىمەن ماراپاتتالعان. 1986 جىلى ومىردەن وتكەن.
ايتا كەتەيىك، كەمەل توقاەۆ - قازاقستان پرەزيدەنتى قاسىم-جومارت توقاەۆتىڭ اكەسى. بيىل جازۋشىنىڭ 100 جىلدىق مەرەيتويىنا ارنالعان ءىس-شارالار ەلىمىزدىڭ بىرنەشە قالاسىندا جانە ءازىربايجان مەن تۇركيادا اتاپ ءوتىلدى. الايدا قازاقستان پرەزيدەنتى ول شارالاردىڭ ەشقايسىسىنا قاتىسپادى.
