ءوزى ءومىر ءسۇرىپ وتىرعان كەزەڭدەگى كەلەڭسىزدىككە ازامات رەتىندە ءۇن قاتقان جانە ءوزى ونەر ادامى بولعاندىقتان قازاق قوعامىنا كەرەعار وقيعانىڭ بارىنە اندەرى ارقىلى قارسىلىق تانىتا بىلگەن ادامدى بىلەسىزدەر مە؟
بىلەمىز، بىراق ىزدەي بەرمەيمىز. ۇمىتىپ كەتكەنبىز.
ۇلكەن سارايلاردا جىلىنا قانشاما كونتسەرت قويىلسا دا، ونى ساحنادان كورمەيمىز. تەلەارنالاردان دا سولاي… ال شىنداپ كەلگەندە مۇقاعالي بولىپ فاريزا اقىنعا مۇڭ شاققان، جەلتوقسان جەلىنىڭ ىزعارىن دا، انا ءتىلىنىڭ ايبىنىن دا وزگەشە سەزىنىپ، الديىمەن نارەستە تولعانايمەن سىرلاسقان ءانشى ابيىربەكتى، كومپوزيتور تىناليەۆتى ىزدەۋىمىز كەرەك ەدى. “قازاقستاننىڭ حالىق ءارتيسى اتاعى قايتا بەرىلەتىن بولدى” دەگەن اڭگىمە شىققاندا ابيىربەك بەينەسى كولبەڭ ەتە قالعانى راس.
ونەر – تابيعات. ول دا كوكتەيدى. بۇرشىك اتادى. ول باپتاعانعا بايلانىستى. باعباننىڭ پەيىلىنە، كۇتۋشىنىڭ كوڭىلىنە تاۋەلدى. ۇلى ونەردى جاسايتىندار دا - سولاي، ەلىنىڭ ەسكەرگەنىن، ەڭبەگىنىڭ ەلەنگەنىن قالايدى. بىراق وزدىگىنەن وزەۋرەپ العا ەنتەلەمەيدى. ەشقاشان… مەن ونىڭ اندەرىنىڭ “شاڭ باسقان ارحيۆتەردە” قالمايتىنىن بىلەم، ويتكەنى جىلدا جەلتوقسان ايىنىڭ ءبىر كۇنىندە “جەلتوقسان جەلى” ءار قازاقتىڭ ىشىنە “كىرىپ” بويىن جىلىتىپ، رۋح سىيلاپ وتەدى. ساحنالاردان كورىنبەي-اق، قالىڭ كورەرمەننىڭ الدىنا شىقپاي-اق ءان بولىپ ورالادى. 37 جىلدان بەرى سولاي!
ەندەشە، “قازاقستاننىڭ حالىق ءارتيسى” دەگەن اتاققا ابيىربەك تىناليەۆ لايىق. ال اتالمىش اتاققا كيەلى ساحنانى اياعىمەن ابدەن بىلعاپ، اۋزىمەن ابدەن لاستاپ ونەردىڭ قادىرىن كەتىرىپ، قۇتىن قاشىرعانداردى جولاتپاعان ءجون. بەتى جىلتىراپ ەكراننان تۇسپەيتىندەردى ەمەس، تاسادا قالعان ابيىربەكتەي دارىنداردىڭ شىعارماشىلىعىن باعالاپ، ماراپاتتايىق. تالانتسىزداردى تۇساۋلاماساق، تۇلپار مەن ەسەكتىڭ قاتار تۇرعانى كورەر كوزگە دە سۇيكىمسىز كورىنەتىنى بەلگىلى. ەندىگى جەردە ونەر ادامدارى سوعان اباي بولۋىمىز كەرەك. ارسىزدارعا ءبارىبىر بولعانىمەن ارلى ادامدار بيىككە ۇمتىلاتىن دا كەز جەتتى. ەسسىزدەر العا شىعىپ، ەستىلەر كەيىن قالعان كەزەڭدى ارتقا تاستار ۋاقىت كەلدى عوي دەپ ويلايمىن.
بەكجان تۇرىس
