بيىل "ەرتىس" تاسىمادى. بىلتىر دا تاسىعانى شامالى. بىلتىر دەمەكشى، انتيرەكوردتىڭ ءبارىن بۇزىپ، ۇيدە دە، تۇزدە دە وڭباي جەڭىلگەن كوماندانى شىلدە ايىندا ديميتار قابىلداپ العان ەدى. جانكۇيەرلەر قۇتقارۋشى كەلگەندەي اۋەجايدان تاڭعى 5-تە ۇلكەن قۋانىشپەن، زور سالتاناتپەن كۇتىپ العان بولاتىن. "حەرو" جاعدايى مۇشكىل كلۋبتى اۋپىرىمدەپ پرەمەر-ليگادا ساقتاپ قالدى.
بيىلعى ماۋسىمعا تاماشا دايىندىقپەن كەلگەنىن ايتقان بولاتىن ديميتروۆ. ءسوزىنىڭ دالەلىندەي قۇراما قاتارىنا كانياس، حيدي، پاراگۋلگوۆ سىندى شەبەر ويىنشىلاردى تارتا ءبىلدى. العاشقى تۋردا ۇتىلعانىمەن كەلەسى ويىندا جەڭىپ، وزىندىك ويىن ورنەگىن قالىپتاستىرا باستاعان. قر كۋبوگىنىڭ شيرەك فينالىنا دا جەتتى. بىراق، سوڭعى ءتورت تۋر قاتارىنان جەڭىلىستىڭ كەرمەك ءدامىن تاتۋدا. ءوز قاقپاسىنا توعىز گول جىبەرىپ، قارسىلاستارىنا 4 ويىندا ءبىر گول دا (!) سوعا الماعان "ەرتىستىڭ" بۇنداي دارمەنسىز كۇيىن كەرەكۋلىكتەر كورمەگەن شىعار. جانكۇيەرلەر فۋتبولشىلاردى باس باپكەردى كەتىرۋ ءۇشىن جاساپ جاتقان امالى دەپ كىنالاۋدا. نۋستىڭ كەزىندە 4-5 گولمەن جەڭىلسە دە، قارسى قاقپاعا 1-2 گول سوعاتىن ەدى. بىلەتىندەر باسشىلىق پەن باپكەردىڭ اراسىندا قارا مىسىق جۇگىرىپ وتكەن دەيدى. بۇرىن پاۆلوداردىڭ ورتالىق ستاديونىن تولتىرىپ وتىراتىن جەرگىلىكتى جانكۇيەرلەر قازىر ەكى-ءۇش سەكتوردى ارەڭ تولتىرۋدا. باسشىلىقپەن باپكەر، باپكەرمەن فۋتبولشىلار ءتىل تابىسا الماعان سوڭ ناتيجە جوعى وزىنەن ءوزى تۇسىنىكتى.
وسى ءسوزىمىزدىڭ دالەلىندەي كەشەگى "جەتىسۋمەن" وتكەن ويىندا ديميتروۆ ستاديونداعى باس باپكەرلىك ورىنىندا بولماعان. ونىڭ ورنىنا باس باپكەردىڭ مىندەتىن اتقارۋشى بولىپ قاقپاشىلار باپكەرى اندرەي نەناشەۆ شىقتى. ماتچتان كەيىنگى ءباسپاسوز ءماسليحاتىندا نەناشەۆ "ديميتار قايدا؟" دەگەن سۇراققا نە دەپ جاۋاپ بەرەرىن دە بىلمەدى. «مەن بىلمەيمىن». بار ايتقانى وسى.
ارتىنان بەلگىلى بولعانىنداي ديميتار ديميتروۆ پەن ونىڭ بولگاريادان كەلگەن ەكى كومەكشىسى گەورگي چيليكوۆ جانە پەتار كولەۆتى ستاديون كۇزەتشىلەرى كىرگىزبەگەن. نە ءۇشىن دەگەن سۇراعىنا باسشىلىقتىڭ نۇسقاۋى سولاي دەپتى.
ال، بۇگىن كلۋب باسشىلىعى باس باپكەردى شاقىرىپ الىپ، كەشە نەگە جۇمىستا بولماعانىن سۇراعان! پارادوكس! ءسويتىپ، ديميتروۆپەن جانە كومەكشىلەرىمەن كەلىسىمشارتتى بىرجاقتى ۇزەتىندىكتەرىن كلۋبتىڭ زاڭگەرى جەتكىزگەن.
ءبىز وسى سۇراقپەن "ەرتىستىڭ" ءباسپاسوز قىزمەتىنە حابارلاسقان ەدىك. ديميتروۆپەن كلۋب رەسمي تۇردە كەلىسىم-شارتتى ۇزبەگەنىن جەتكىزدى. ال، ديميتاردىڭ تەلەفونىنا حابارلاسۋ مۇمكىن بولمادى. ەلىمىزدەگى ەڭ كوپ جۇلدە العان داڭقتى كلۋبتىڭ جانكۇيەرلەرى كلۋب باسشىلىعىنان جاعدايدى تۇراقتاندىرۋدى تالاپ ەتۋدە.
ديميتار ديميتروۆ باپكەر رەتىندەگى جەتىستىكتەرى.
«نەفتوحيميك»
بولگاريانىڭ ۆيتسە-چەمپيونى: 1996/97
پفل كۋبوگىنىڭ جەڭىمپازى: 1996, 1997
"ليتەكس"
بولگاريا چەمپيونى: 1997/98
"لەۆسكي"
بولگاريا چەمپيونى: 1999/00
«ەرتىس»
قازاقستان چەمپيوناتىنىڭ قولا جۇلدەگەرى: 2016
«لۋدوگورەتس»
بولگاريا چەمپيونى: 2017/18
سونداي-اق ارابيالىق ال-ناسر" مەن رەسەيلىك "امكار", بولگاريالىق "چەرنومورەتس", "بوتەۆ" كلۋبتارىندا قىزمەت ەتتى.
بۋرگاس جانە پاۆلودار قالاسىنىڭ قۇرمەتتى ازاماتى.
وڭعار قابدەن
"ادىرنا" ۇلتتىق پورتالى
