Dımıtardy "Ertis" ketirdi me?

2206
Adyrna.kz Telegram

Bıyl "Ertis" tasymady. Byltyr da tasyǵany shamaly. Byltyr demekshi, antırekordtyń bárin buzyp, úıde de, túzde de ońbaı jeńilgen komandany shilde aıynda Dımıtar qabyldap alǵan edi. Jankúıerler qutqarýshy kelgendeı áýejaıdan tańǵy 5-te úlken qýanyshpen, zor saltanatpen  kútip alǵan bolatyn. "Hero" jaǵdaıy múshkil klýbty áýpirimdep Premer-Lıgada saqtap qaldy.

Bıylǵy maýsymǵa tamasha daıyndyqpen kelgenin aıtqan bolatyn Dımıtrov. Sóziniń dálelindeı qurama qataryna Kanıas, Hıdı, Paragýlgov syndy sheber oıynshylardy tarta bildi. Alǵashqy týrda utylǵanymen kelesi oıynda jeńip, ózindik oıyn órnegin qalyptastyra bastaǵan. QR Kýbogynyń shırek fınalyna da jetti. Biraq, sońǵy tórt týr qatarynan jeńilistiń kermek dámin tatýda. Óz qaqpasyna toǵyz gol jiberip, qarsylastaryna 4 oıynda bir gol da (!) soǵa almaǵan "Ertistiń" bundaı dármensiz kúıin kerekýlikter kórmegen shyǵar. Jankúıerler fýtbolshylardy bas bapkerdi ketirý úshin jasap jatqan amaly dep kinálaýda. Nýstyń kezinde 4-5 golmen jeńilse de, qarsy qaqpaǵa 1-2 gol soǵatyn edi. Biletinder basshylyq pen bapkerdiń arasynda qara mysyq júgirip ótken deıdi. Buryn Pavlodardyń ortalyq stadıonyn toltyryp otyratyn jergilikti jankúıerler qazir eki-úsh sektordy áreń toltyrýda. Basshylyqpen bapker, bapkermen fýtbolshylar til tabysa almaǵan soń nátıje joǵy ózinen ózi túsinikti.

Osy sózimizdiń dálelindeı keshegi "Jetisýmen" ótken oıynda Dımıtrov stadıondaǵy bas bapkerlik orynynda bolmaǵan. Onyń ornyna bas bapkerdiń mindetin atqarýshy bolyp qaqpashylar bapkeri Andreı Nenashev shyqty. Matchtan keıingi baspasóz máslıhatynda  Nenashev "Dımıtar qaıda?" degen suraqqa ne dep jaýap bererin de bilmedi. «Men bilmeımin». Bar aıtqany osy.

Artynan belgili bolǵanyndaı Dımıtar Dımıtrov pen onyń Bolgarııadan kelgen eki kómekshisi  Georgıı Chılıkov jáne Petar Kolevti stadıon kúzetshileri kirgizbegen. Ne úshin degen suraǵyna basshylyqtyń nusqaýy solaı depti.

Al, búgin klýb basshylyǵy bas bapkerdi shaqyryp alyp, keshe nege jumysta bolmaǵanyn suraǵan! Paradoks! Sóıtip, Dımıtrovpen jáne kómekshilerimen kelisimshartty birjaqty úzetindikterin klýbtyń zańgeri jetkizgen.

Biz osy suraqpen "Ertistiń" baspasóz qyzmetine habarlasqan edik. Dımıtrovpen klýb resmı túrde kelisim-shartty úzbegenin jetkizdi. Al, Dımıtardyń telefonyna habarlasý múmkin bolmady. Elimizdegi eń kóp júlde alǵan dańqty klýbtyń jankúıerleri klýb basshylyǵynan jaǵdaıdy turaqtandyrýdy talap etýde.

Dımıtar Dımıtrov bapker retindegi jetistikteri.

«Neftohımık»
Bolgarııanyń vıe-chempıony: 1996/97
PFL kýbogynyń jeńimpazy: 1996, 1997

"Lıteks"
Bolgarııa chempıony: 1997/98

"Levskı"
Bolgarııa chempıony: 1999/00

«Ertis»
Qazaqstan chempıonatynyń qola júldegeri: 2016

«Lýdogore»
Bolgarııa chempıony: 2017/18

Sondaı-aq arabııalyq Al-Nasr" men reseılik "Amkar", bolgarııalyq "Chernomore", "Botev" klýbtarynda qyzmet etti.

Býrgas jáne Pavlodar qalasynyń qurmetti azamaty.

Ońǵar Qabden

"Adyrna" ulttyq portaly

 

Pikirler