قازاقستاندا 2016 جىلدان باستاپ جىل سايىن «ەڭبەك جولى» رەسپۋبليكالىق بايقاۋى وتەدى. بۇل شارا ەڭبەك كۇنىن مەرەكەلەۋگە جانە «ەڭبەك ادامىنا» قۇرمەت كورسەتۋگە ارنالعان. بۇل تۋرالى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى جاريالادى، دەپ حابارلايدى “ادىرنا” ۇلتتىق پورتالى.
بايقاۋ نوميناتسيالارىنىڭ ءبىرى – «ۇزدىك ەڭبەك اۋلەتى». وسى نوميناتسيا بويىنشا جەڭىمپازداردىڭ جيىنتىق ەڭبەك ءوتىلى 2,5 مىڭ جىلدان استام ۋاقىتتى قۇرايدى.
ءبىر اۋلەتتىڭ بىرنەشە بۋىنى ءبىر سالادا جىلدار بويى جۇمىس ىستەپ، بۇل كاسىپ ءتۇرى مەن مول تاجىربيەلەرى ۇرپاقتان ۇرپاققا قالۋدا. بۇل رەتتە تەمىرجول جۇمىسكەرلەرى سايىستىڭ باسقا لاۋرەاتتارىنا قاراعاندا 4 ەسە كوپ.
سولاردىڭ ءبىرى بىلتىر جەڭىمپاز اتانعان تۇكىباەۆتار اۋلەتى. وسى وتباسىنىڭ جالپى ەڭبەك ءوتىلى 580 جىلدان اسادى. اۋلەتتىڭ نەگىزىن قالاۋشىلارى تەمىرجول سالاسىنداعى ەڭبەك جولىن وتكەن عاسىردىڭ وتىزىنشى جىلدارى باستاعان. ولار تۇركىستان-ءسىبىر ماگيسترالىنىڭ قۇرىلىسىنا قاتىسقان.
ەڭبەك جولى ەرەكشە تاعى ءبىر اۋلەت – قۇرمانعاليەۆتەر وتباسى. ولاردىڭ ورمان شارۋاشىلىعى سالاسىندا 458 جىلعا جۋىق ەڭبەك ءوتىلى بار جانە جالپى ءتورت ۇرپاقتىڭ 25 وكىلىنىڭ ەڭبەك جولى ورمان شارۋاشىلىعىمەن بايلانىستى.
ەستەرىڭىزگە سالساق، «ەڭبەك جولى» بايقاۋى ەڭبەك ەتۋگە ىنتالاندىرۋعا، جاستار اراسىندا جۇمىسشى ماماندىقتارىن ناسيحاتتاۋعا جانە جۇمىسشى اۋلەتتەردىڭ كوپجىلدىق داستۇرلەرىن نىعايتۋعا باعىتتالعان.
كونكۋرس ءۇش نوميناتسيا بويىنشا وڭىرلىك جانە رەسپۋبليكالىق دەڭگەيدە ەكى كەزەڭدە وتەدى: «ۇزدىك ەڭبەك اۋلەتى» – ەڭبەك ءوتىلى ەڭ ۇزاق، ماراپاتى ەڭ كوپ اۋلەت; «جۇمىس ىستەيتىن جاستاردىڭ ۇزدىك تالىمگەرى» – جۇمىس ءوتىلى كەمىندە 20 جىل، جوعارى ءتيىمدى جۇمىس ىستەيتىن تالىمگەر; «ءوندىرىس ۇزدىك جاس جۇمىسكەرى» – جۇمىس ءوتىلى 5 جىلدان اسپايتىن ءوندىرىستىڭ ەڭ بەلسەندى جانە ەڭبەكقور قىزمەتكەرى تاڭدالادى.
بيىل كونكۋرسقا قاتىسۋ ءۇشىن قازاقستاننىڭ بارلىق وڭىرلەرىنەن 591 ءوتىنىش ءتۇستى.
كونكۋرستىڭ رەسپۋبليكالىق كەزەڭىنىڭ قورىتىندىسى جاقىن ارادا بەلگىلى بولادى. 2023 جىلعى «ەڭبەك جولى» جەڭىمپازدارىن سالتاناتتى ماراپاتتاۋ ءراسىمى وسى جىلدىڭ قىركۇيەك ايىنىڭ سوڭىندا وتكىزۋ جوسپارلانعان.
