الماتىدا ءدىن سالاسىنداعى ۇزدىك ماتەريالدارعا ارنالعان بايقاۋ 6 جىل بويى جالعاسىپ كەلەدى.
داستۇرگە اينالعان ەرەكشە بايقاۋ قوعامداعى تۇراقتىلىقتى نىعايتۋ، ءدىني ەكسترەميزم مەن راديكاليزمنىڭ الدىن الۋ ءۇشىن وتكىزىلىپ كەلەدى. بايقاۋدى الماتى قالاسى ءدىن ىستەرى جونىندەگى باسقارماسىنىڭ تاپسىرىسى بويىنشا "جاۋحار" ۇلتتىق سالت-ءداستۇردى قولداۋ قورى" ۇيىمداستىرۋدا.
بايقاۋدىڭ نەگىزگى ماقساتى - ءدىني ەكسترەميزمگە قارسى ءىس-قيمىل جانە كونفەسسياارالىق كەلىسىم يدەيالارىن ناسيحاتتاۋ، وزەكتى ماسەلەلەر بويىنشا ۇزدىك جۋرناليستەر مەن باسقا دا ازاماتتاردى انىقتاۋ جانە ىنتالاندىرۋ جانە قوعامدا تۇراقتىلىقتى نىعايتۋ ماسەلەلەرىنە جۋرناليستەر مەن بەلسەندى ازاماتتاردىڭ نازارىن اۋدارۋ. ۇيىمداستىرۋشىلاردىڭ سوزىنشە، جۋرناليستەر مەن باق-تى، سونداي-اق، ءدىن سالاسىنداعى وزەكتى ماسەلەلەر بويىنشا ماتەريالدار جاريالايتىن وزگە ازاماتتاردى قولداۋ بايقاۋدىڭ نەگىزگى ماقساتى بولىپ تابىلادى.
وتكەن جىلمەن سالىستىرعاندا بايقاۋدىڭ جۇلدە قورى وسكەن. 2024 جىلعى بايقاۋدىڭ جۇلدە قورى 3 050 000 تەڭگە بولسا، بيىل جەڭىمپازدارعا بەرىلەتىن سىياقىنىڭ جالپى كولەمى – 3 500 000 تەڭگە. سونداي-اق، بيىل جەڭىمپازدار وتكەن جىلداعىداي 10 نوميناتسيا ەمەس، 7 باعىت بويىنشا باق سىنايدى. ۇزدىك پىكىر يەسىنە 150 000 تگ، الەۋمەتتىك جەلىلەردەگى ۇزدىك تاقىرىپتىق پوست – 250 000 تگ، ينتەرنەت-رەسۋرستا قازاق تىلىندەگى ۇزدىك ماقالا – 350 000 تگ، ينتەرنەت-رەسۋرستا ورىس تىلىندەگى ۇزدىك ماقالا – 350 000 تگ، «ينستاگرام» الەۋمەتتىك جەلىسىندەگى ۇزدىك بەينەروليك – 600 000 تگ، «تيكتوك» الەۋمەتتىك جەلىسىندەگى ۇزدىك بەينەروليك – 600 000 تگ، ۇزدىك موتيۆاتسيالىق ءسوز جانە ۇندەۋ – 300 000 تگ الادى. ال 10 قاتىسۋشىعا ىنتالانلىرۋ ماقساتىندا 70 مىڭ تەڭگە كولەمىندە سىياقى بەرىلمەك.
جوبانىڭ تيىمدىلىگىن ارتتىرۋ ماقساتىندا ءار جىلى نوميناتسيالار سانى مەن تۇرلەرى وزگەرىپ وتىرادى. سونىمەن قاتار، بايقاۋدىڭ باستى تالاپتارىنىڭ ءبىرى – قاتىسۋشىلار بۇرىن جاسالعان نەمەسە باسقا مەملەكەتتىك ورگانداردىڭ تاپسىرىسىمەن دايىندالعان ماتەريالداردى ۇسىنباۋى ءتيىس. بارلىق جۇمىستار تەك وسى بايقاۋ اياسىندا ارنايى ازىرلەنۋى قاجەت. اتالمىش بايقاۋعا وتكەن كەزەڭنىڭ جەڭىمپازدارى جاڭا ماتەريال ۇسىنىپ، قاتىسۋىنا دا مۇمكىندىك بار.
"بىلتىر 10 نوميناتسيا بولدى. كەي نوميناتسيالارعا قاتىسۋشىلاردىڭ قىزىعۋشىلىعى تومەن بولعانىن، جۇمىستىڭ كىشكەنە قيىندىق تۋدىرعانىن بايقادىق. كەي نوميناتسيانى قىسقارتتىق، بىراق جۇلدە قورىن كوبەيتتىك", - دەيدى ءبولىم باسشىسى باقداۋلەت ءابدىحاميتوۆ.
بايقاۋعا 16 جاستان اسقان الماتى قالاسىنىڭ تۇرعىندارى، ستۋدەنتتەر، زەينەتكەرلەر دە قاتىسا الادى. جۇمىستار قازاق جانە ورىس تىلدەرىندە قابىلدانادى. قاتىسۋشىلار ءوز ماتەريالدارىن 2025 جىلدىڭ 1 قازانىنا دەيىن جاريالاپ، ۇيىمداستىرۋشىلاردىڭ پوشتاسىنا جىبەرۋى ءتيىس.
قاتىسۋشىلاردىڭ ماتەريالدارى 2025 جىلدىڭ 1 قازانىنا دەيىن almaty.baiqau.2025@mail.ru رەسمي پوشتاسىنا جولدانۋى ءتيىس. ارنايى قۇرىلعان قازىلار القاسى بارلىق جۇمىستاردى قاراپ، جەڭىمپازداردى انىقتايدى. ەرەجەگە سايكەس، كوميسسيا قۇرامىندا كەمىندە 5, بىراق 9 مۇشەدەن اسپايتىن ساراپشى بولۋى ءتيىس. سونىمەن قاتار، قازىلار القاسىنىڭ مۇشەلەرىنىڭ سانى جۇپ بولماۋى كەرەك. ونىڭ قۇرامىنا الماتى قالاسى ءدىن ىستەرى جونىندەگى باسقارماسىنىڭ وكىلدەرى، قوعام قايراتكەرلەرى، ءدىن سالاسىنداعى ساراپشىلار مەن جۋرناليستەر كىرەدى. كوميسسيانى توراعا باسقارادى، ال ول بولماعان جاعدايدا ونىڭ ورىنباسارى جەتەكشىلىك ەتەدى. قازىلار القاسى بايقاۋدىڭ ىرىكتەۋ كەزەڭدەرىن زەردەلەپ، قورىتىندى شەشىمدى داۋىس بەرۋ ارقىلى قابىلدايدى. بارلىق شەشىمدەر حاتتاماعا تىركەلىپ وتىرادى.
بايقاۋ جەڭىمپازدارىن انىقتاۋ پروتسەسى اشىق جانە ءادىل وتەدى دەپ كۇتىلۋدە. قازىلار القاسىنىڭ شەشىمى نەگىزىندە جەڭىمپازدار 2025 جىلدىڭ قازان ايىنىڭ سوڭىندا ماراپاتتالادى.
