پرەزيدەنت قاسىم-جومارت توقاەۆ پەن وزبەكستان پرەزيدەنتى شاۆكات ميرزيوەۆتىڭ قاتىسۋىمەن ەكىجاقتى ساۋدا-ەكونوميكالىق ىنتىماقتاستىق جونىندەگى جول كارتاسىنا قول قويۋ ءراسىمى ۇيىمداستىرىلدى.
بۇل قۇجات ەكى ەل اراسىنداعى تەك قاعاز جۇزىندەگى كەلىسىم ەمەس، ناقتى ىستەر مەن ءىرى جوبالاردىڭ باستاۋى.
بۇل جول كارتاسى كەزدەيسوق قابىلدانعان جوق. پرەزيدەنت قاسىم-جومارت توقاەۆتىڭ 2025 جىلعى 14-15 قاراشادا وزبەكستانعا جاساعان رەسمي مەملەكەتتىك ساپارىنىڭ تىكەلەي زاڭدى جالعاسى بولىپ تابىلادى. ساپار بارىسىندا تاراپتار جوعارى دەڭگەيدەگى ۋاعدالاستىقتارعا قول جەتكىزگەن بولاتىن، ال بۇگىنگى قۇجات سول كەلىسىمدەردى ءىس جۇزىندە جۇزەگە اسىرۋدىڭ ناقتى تەتىگىنە اينالماق.
جاڭادان قابىلدانعان قۇجات اۋقىمدىلىعىمەن جانە ستراتەگيالىق ماڭىزدىلىعىمەن ەرەكشەلەنەدى. جول كارتاسى اياسىندا ەكى ەل ەكونوميكاسىنىڭ درايۆەرىنە اينالاتىن مىناداي باسىم باعىتتار بويىنشا جاڭا جوبالار جۇزەگە اسىرىلادى:
- ونەركاسىپ جانە مەتاللۋرگيا:وندىرىستىك الەۋەتتى بىرىكتىرىپ، بىرلەسكەن كاسىپورىندار قۇرۋ.
- مۇناي حيمياسى: شيكىزاتتى تەرەڭ وڭدەۋ جانە جوعارى تەحنولوگيالىق ونىمدەر شىعارۋ.
- لوگيستيكا: ورتالىق ازيا وڭىرىندەگى ترانزيتتىك دالىزدەردى دامىتىپ، تاۋار اينالىمىن جەدەلدەتۋ.
- اگروونەركاسىپ كەشەنى: ازىق-تۇلىك قاۋىپسىزدىگىن قامتاماسىز ەتۋ جانە اۋىل شارۋاشىلىعى ونىمدەرىنىڭ ساۋداسىن ارتتىرۋ.
- «جاسىل» ەنەرگيا: زاماناۋي ترەندتەرگە ساي، ەكولوگيالىق تازا قۋات كوزدەرىن بىرلەسە دامىتۋ.
- تۋريزم: ەكى ەل اراسىنداعى تۋريستىك اعىندى كۇشەيتۋ جانە ورتاق مارشرۋتتار قالىپتاستىرۋ.
