توقاەۆ مينيسترلەرگە پرەزيدەنت اكىمشىلىگىنە جالتاقتاماي، مىندەتتەرىن اتقارۋدى تاپسىردى. سونداي-اق، رەفورمالاردىڭ ىسكە اسىرىلۋىنا نەگىزىنەن اتقارۋشى بيلىك جاۋاپ بەرەتىنىن ايتتى، دەپ حابارلايدى “ادىرنا” ۇلتتىق پورتالى.
بىرىنشىدەن، ناقتى سالالارعا قاتىستى شەشىمدەردى ازىرلەۋ جانە ورىنداۋ مىندەتى، سونداي-اق تۇپكى ناتيجە ءۇشىن جاۋاپكەرشىلىك تولىعىمەن مينيسترلەرگە جۇكتەلەدى. ويتكەنى ولار ءوزىنىڭ بۇيرىعىمەن جەدەل شەشىم قابىلداپ وتىرۋعا ءتيىس. بۇل – اكىمدەرگە دە قاتىستى ماسەلە، – دەدى پرەزيدەنت.
ەكىنشىدەن، ەكونوميكالىق ساياساتتىڭ ىسكە اسىرىلۋىنا ۇكىمەت تولىعىمەن جاۋاپ بەرمەك.
بيۋروكراتياعا جانە سوزبۇيداعا سالىنباي، پرەزيدەنت اكىمشىلىگىنە جالتاقتاماي، ەكونوميكانى دەربەس باسقارۋدىڭ بارلىق ءادىس-تاسىلدەرىن قولىندا ۇستاۋعا ءتيىس، – دەدى توقاەۆ.
ودان بولەك، پرەزيدەنت اكىمشىلىگىنە قانداي مىندەتتەر جۇكتەلەتىنى دە ايتىلدى.
ۇشىنشىدەن، پرەزيدەنت اكىمشىلىگى باستى «ساياسي شتاب» رەتىندە مەملەكەتتى الەۋمەتتىك-ەكونوميكالىق دامىتۋدىڭ ستراتەگيالىق باعىتتارىنا، ىشكى جانە سىرتقى ساياسات، قورعانىس جانە قاۋىپسىزدىك، قۇقىق جانە كادر ساياساتى ماسەلەلەرىنە بارلىق كۇش-جىگەرىن جۇمىلدىرادى. مەملەكەتتىك اپپاراتتى بيۋروكراتيادان ارىلتۋ جولىنداعى جۇيەلى جۇمىس جالعاسا بەرەدى. مەملەكەتتىك جوسپارلاۋ جۇيەسىن تۇبەگەيلى وزگەرتۋ قاجەت. بىزگە ونىڭ مەيلىنشە شاعىن جانە قولايلى بولعانى ماڭىزدى، – دەدى پرەزيدەنت.
