قازاقستان ۇلتارالىق كەلىسىم مەن بەيبىتشىلىككە نۇقسان كەلتىرۋگە باعىتتالعان ارانداتۋشىلىق ارەكەتتەردىڭ جولىن كەسەتىن بولادى. بۇل تۋرالى مەملەكەت باسشىسى قاسىم-جومارت توقاەۆ قازاقستان حالقى اسسامبلەياسىنىڭ (قحا) XXXIV سەسسياسىندا ايتتى، دەپ حابارلايدى “ادىرنا” ۇلتتىق پورتالى.
"كۇرىش پەن كۇرمەكتى، كونسترۋكتيۆتى سىن مەن دالەلسىز ءمىن تاعۋدى، كوڭىلگە تيمەيتىن پاروديا مەن جيىركەنىشتى قورلاۋدى ايىرا ءبىلۋ ماڭىزدى. زاڭ الدىندا ءبارى تەڭ. سول سەبەپتى ءبىز ەلىمىزدەگى ەتنوسارالىق كەلىسىم مەن بەيبىتشىلىككە نۇقسان كەلتىرەتىن كەز كەلگەن ارانداتۋدىڭ جولىن كەسىپ كەلەمىز، بۇدان ءارى دە قاتاڭ توسقاۋىل قويامىز. وزدەرىن ءسوز ەركىندىگىنىڭ جاقتاۋشىسى رەتىندە كورسەتكىسى كەلەتىن كەيبىر قۇقىق قورعاۋ ۇيىمدارىنىڭ وكىلدەرى، بلوگەرلەر مەن جۋرناليستەر ەلىمىزدەگى ءار ىستەن ساياسي، جاعىمسىز استار ىزدەپ، شىن مانىندە، ارانداتۋمەن اينالىسىپ جۇرگەنىن ايتپاسقا بولمايدى.
بۇل قازاقستاننان كوشىپ كەتىپ، شەتەلدە ءجۇرىپ حالقىمىزعا شابۋىل جاسايتىن، ءتىپتى، مەملەكەتتىك ورگانداردى بوپسالايتىن بۇرىنعى ازاماتتارىمىزدىڭ ارەكەتى. ولار شەت مەملەكەتتەر بەرگەن اقشانى اقتاۋعا جۇمىس ىستەپ ءجۇر. بۇگىندە مۇنى ءبارى بىلەدى. دەموكراتيانى بىرەۋدىڭ قارجىسىمەن ورناتۋعا بولمايدى. ەلىمىزدىڭ ءال-اۋقاتى، سونىڭ ىشىندە دەموكراتيا مەن ءسوز بوستاندىعى ءۇشىن شەتەلدە ەشكىمنىڭ باسى اۋىرىپ، بالتىرى سىزدامايدى. ونى ناقتى تۇسىنگەن ءجون”، دەدى توقاەۆ.
سونداي-اق، مەملەكەت باسشىسى ەلىمىزدىڭ تۇيىتكىلدى ماسەلەلەرىن ءوزىمىزدىڭ ۇلتتىق مۇددەمىز بەن زاڭناما اياسىندا شەشەتىنىمىزدى ايتتى.
“جاقىندا شەتەلدىك ۇكىمەتتىك ەمەس ۇيىمداردىڭ ارەكەتتەرى اشكەرەلەندى. سوندا ولاردىڭ ارام نيەتى، اشكوزدىگى مەن قازاقستانعا جانى اشىمايتىنى انىق كورىندى. سونداي-اق كەيبىر تانىمال قازاقستاندىق گرانت الۋشىلاردىڭ كولەڭكەلى ارەكەتتەرى دە بەلگىلى بولدى. قازاقستاندا پروبلەما جوق دەمەيمىز. ارينە، باسقا ەلدەردەگىدەي بىزدە دە تۇيتكىلدەر بار. بىراق ءبىز ونى الدەكىمدەردىڭ ادىستەمەسىمەن ەمەس، ءوزىمىزدىڭ ۇلتتىق مۇددەمىز بەن زاڭناما اياسىندا شەشەمىز.
وسىنداي قيسىندى ارەكەتتەرىمىزدى حالقىمىزدىڭ باسىم كوپشىلىگى مەن نيەتى ادال حالىقارالىق سەرىكتەستەرىمىز دۇرىس تۇسىنەتىنىنە سەنىمدىمىن. يدەولوگيالىق وشپەندىلىك – ءبىزدىڭ دۇنيەتانىمىمىزعا مۇلدە جات. ءداستۇرىمىز بەن قۇندىلىقتارىمىز، بولمىسىمىز بەن ءومىر سالتىمىز ۇلتىمىزدى ءبىرتۇتاس تاريحي-مادەني جانە ساياسي قاۋىم رەتىندە بىرىكتىرىپ، تۇتاستىعىن بەكەمدەيدى", - دەدى پرەزيدەنت.
