سەيسميكالىق قاۋىپسىزدىك ماسەلەلەرى جونىندەگى كەڭەستە پرەزيدەنت توقاەۆ توتەنشە جاعدايلار مينيسترلىگىنە ءوز قىزمەتىن سىني تۇرعىدان قاراۋ كەرەك ەكەنىن تاپسىردى، - دەپ حابارلايدى “ادىرنا” ۇلتتىق پورتالى اقورداعا سىلتەمە جاساپ.
ەلباسى سىرىم شارىپحانوۆقا قاراتا ءسوز سويلەپ، ونىڭ وسى سالانىڭ مامانى ەكەنىن، تەوريالىق ءبىلىمى بار ەكەنىن، بىراق ناقتى جۇمىسقا كەلگەندە ەڭبەگىنىڭ جەمىسى كورىنىپ تۇر دەۋگە بولمايتىنىن اتاپ ءوتتى.
“قازىرگى جۇمىستى كوڭىلدەن شىعادى دەپ ايتۋعا كەلمەيدى. مينيستر شارىپحانوۆقا ەسكەرتەمىن. ەگەر ءسىز ءوز جۇمىسىڭىزدى اۋىر سانايتىن بولساڭىز، اشىعىن ايتىڭىز، عىلىمي-وقىتۋشىلىق قىزمەتىڭىزگە قايتارامىز. وندا تۇرعان ەشتەڭە جوق. قازىرگى احۋال وتە كۇردەلى جانە جاۋاپتى، ەلىمىزدىڭ قاۋىپسىزدىگىنە تىكەلەي بايلانىستى. سوندىقتان ءبارىمىز جيناقى، ۇقىپتى جانە بەلسەندى بولۋىمىز قاجەت. باسقا جول جوق. پرەزيدەنت اكىمشىلىگى بۇگىن ايتىلعان بارلىق ماسەلەنى باقىلاۋدا ۇستايدى”، – دەدى مەملەكەت باسشىسى.
سونداي-اق ول قالاداعى سيرەنالاردىڭ قوسىلماعانى دۇرىس شەشىم بولعانىن دا اتاپ ءوتتى.
“دابىل قوسىلمادى. بۇل دۇرىس شەشىم بولدى. ايتپەسە، قالادا دۇربەلەڭ تۋىندايتىن ەدى. بىراق حالىقتى باسقا بايلانىس ارنالارى ارقىلى حاباردار ەتۋ قاجەت بولاتىن. قۇلاقتاندىرۋ بىرنەشە نەگىزگى مىندەتتى شەشۋى كەرەك”، - دەدى توقاەۆ.
ءسوزىنىڭ سوڭىندا قاسىم-جومارت توقاەۆ الماتى قالاسىنىڭ تۇرعىندارىن سابىرلى بولۋعا شاقىردى.
ايتا كەتەيىك، قاسىم-جومارت توقاەۆ 24 قاڭتاردا الماتىعا جۇمىس ساپارىمەن كەلگەن ەدى.
