"ادىرنا" ۇلتتىق پورتالى اقتوبە وبلىسىنىڭ ءبىلىم باسقارماسىنا قاراستى "اقتوبە-دارىن" وڭىرلىك عىلىمي تاجىريبەلىك قوسىمشا ءبىلىم بەرۋ ورتالىعى «ەلباسى مەدالى» باعدارلاماسىنا 104 910 714 تەڭگە قارجى بولگەنى تۋرالى سىني ماتەريال جاريالاعان ەدى. سول سىننان كەيىن اقتوبە وبلىستىق مەملەكەتتىك ساتىپ الۋ باسقارماسى اتالعان جوبانى توقتاتىپ، بولىنگەن قارجىنى بيۋدجەتكە قايتاردى، - دەپ حابارلايدى «ادىرنا» اقپاراتتىق پورتالى.
ءتىلشىمىز بيىل 15 اقپان كۇنى قر پرەزيدەنتى قاسىم-جومارت توقاەۆ «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» قر كونستيتۋتسيالىق زاڭىنىڭ كۇشىن جويۋ تۋرالى» زاڭعا قول قويعانىن، سودان بەرى، رەسمي تۇردە ەلىمىزدەگى بارلىق سالادا «ەلباسى» دەگەن اتاۋ ەستىلمەي كەتكەنىن، اقتوبە وبلىسىنىڭ ءبىلىم باسقارماسى سول ۇمىتىلا باستاعان اتاۋدى قايتا جاڭعىرتىپ، «ەلباسى مەدالى» باعدارلاماسىنا 104 910 714 تەڭگە بولگەنىن سىناعان ەدى.
سول سىنعا "اقتوبە وبلىسىنىڭ مەملەكەتتىك ساتىپ الۋلار باسقارماسى" رەسمي جاۋاپ بەردى. ول جاۋاپتا: "20 تامىزداعى №504
بۇقارالىق اقپارات قۇرالدارى ارقىلى جولداعان سۇراۋىڭىزدى قاراپ، كەلەسىنى حابارلايدى. "ەلباسى مەدالى"
جوباسى قازاقستان رەسپۋبليكاسى ۇكىمەتىنىڭ "ون ءتورت جاستان جيىرما توعىز جاسقا دەيىنگى بالالار مەن جاستاردى پاتريوتتىق تانىتقانى جانە بەلسەندى ازاماتتىق ۇستانىمى ءۇشىن ەرەكشەلىك
بەلگىسىمەن ناگرادتاۋ قاعيدالارىن بەكىتۋ تۋرالى" 2020 جىلعى 24 ساۋىردەگى № 249 قاۋلىسىنا سايكەس جۇزەگە اسىرىلدى. قازىرگى تاڭدا بۇعان دەيىن مەملەكەتتىك پورتالدا جاريالانعان "ەلباسى
مەدالىنە" قاتىستى مەملەكەتتىك ساتىپ الۋلار كونكۋرسى توقتاتىلدى. اتالعان ماقساتقا بولىنگەن قاراجات بيۋدجەتكە كەرى قايتارىلادى. اتالعان جوبا الداعى ۋاقىتتا جالعاسىن تاپپايدى" دەلىنگەن.
"ەلباسى مەدالىنە" ەسەپسىز بولىنگەن قارجىنىڭ بيۋدجەتكە كەرى قايتقانى قۇپتارلىق جايت. بۇل ماسەلە اقپارات قۇرالىندا جاريالانباسا، اقتوبەلىك شەنەۋنىكتەر ەسكى قازاقستاندا قالىپ كەتە بەرمەك پە؟
ءبىزدى وسى سۇراق مازالايدى...
قانات بىرلىكۇلى
"ادىرنا" ۇلتتىق پورتالى
