اقتوبە وبلىسىنىڭ ءبىلىم باسقارماسىنا قاراستى "اقتوبە-دارىن" وڭىرلىك عىلىمي تاجىريبەلىك قوسىمشا ءبىلىم بەرۋ ورتالىعى «ەلباسى مەدالى» باعدارلاماسىنا 104 910 714 تەڭگە قارجى ءبولدى، - دەپ حابارلايدى «ادىرنا» اقپاراتتىق پورتالى goszakup.gov.kz cايتىنا سىلتەمە جاساپ.
بيىل 15 اقپان كۇنى قر پرەزيدەنتى قاسىم-جومارت توقاەۆ «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» قر كونستيتۋتسيالىق زاڭىنىڭ كۇشىن جويۋ تۋرالى» زاڭعا قول قويدى. سودان بەرى، رەسمي تۇردە ەلىمىزدەگى بارلىق سالادان «ەلباسى» دەگەن اتاۋ دا الىنىپ تاستالعانداي ەستىلمەي كەتكەن ەدى.
اقتوبە وبلىسىنىڭ ءبىلىم باسقارماسى سول ۇمىتىلا باستاعان اتاۋدى قايتا جاڭعىرتىپ، «ەلباسى مەدالى» باعدارلاماسىنا 104 910 714 تەڭگە ءبولىپتى.
مەملەكەتتىك ساتىپ الۋ لوتىنىڭ رەسمي اتاۋى: «ون ءتورت جاستان جيىرما توعىز جاسقا دەيىنگى «ەلباسى مەدالى» باعدارلاماسىنا قاتىسۋشىلاردى ادىستەمەلىك جانە ۇيىمداستىرۋشىلىق قولداۋدى قامتاماسىز ەتۋ جونىندەگى قىزمەتتەر» دەپ اتالادى.
لوتتىڭ تەحنيكالىق سيپاتتاماسىندا "ەلباسى مەدالى" باعدارلاماسىنا 14-29 جاس ارالىعىنداعى جاستاردىڭ قاتىسا الاتىنى، جوباعا 1000 قاتىسۋشى تارتىلاتىنى كورسەتىلگەن. شارا بارىسىندا ۇيىمداستىرۋشىلار قيىندىقتاردى جەڭىپ، ءارتۇرلى سالالاردا ءوزىن جۇيەلى تۇردە دامىتىپ، باسقالارعا قامقورلىق جاسايتىن، العا قويعان ماقساتتارى مەن جوعارى ناتيجەلەرىنە قول جەتكىزەتىن تۇلعالاردى قالىپتاستىرۋدى باستى نازاردا ۇستايتىنىن تىلگە تيەك ەتكەن.
سونىمەن قاتار، تەحنيكالىق سيپاتتامادا «قىزمەتتەردى ورىنداۋ ءۇشىن قر ۇكىمەتىنىڭ 2020 جىلعى 14 مامىرداعى № 296 قاۋلىسى، نۇرسۇلتان نازارباەۆ قورىنىڭ 2021 جىلعى 3 ناۋرىزداعى № 01/011-ت "ەلباسى مەدالى" باعدارلاماسىنىڭ سەرىكتەستەرىن بەكىتۋ تۋرالى قۇجاتى نەگىز بولىپ تابىلاتىنى جازىلىپتى.
«ەلباسى مەدالى» باعدارلاماسىنا قاتىستى اتالعان تەندەر اشىق كونكۋرس تاسىلىمەن 14 تامىز كۇنى جاريالانعان. وتىنىمدەردى قابىلداۋ مەرزىمى 11 كۇننەن كەيىن، ياعني 29 تامىز كۇنى اياقتالادى.
اقتوبە وبلىسىنىڭ ءبىلىم باسقارماسىنا قاراستى "اقتوبە-دارىن" وڭىرلىك عىلىمي تاجىريبەلىك قوسىمشا ءبىلىم بەرۋ ورتالىعى وتكىزىپ جاتقان «ەلباسى مەدالى» باعدارلاماسىنا قاتىستى تەندەردى قانداي كومپانيانىڭ ۇتىپ الاتىنىن 29 تامىز كۇنى قوسىمشا حابارلايتىن بولامىز.
قانات بىرلىكۇلى
“ادىرنا” ۇلتتىق پورتالى
