قر سىرتقى ىستەر مينيسترلىگى رەسەيدىڭ الماتىداعى بۇرىنعى باس كونسۋلى ەۆگەني بوبروۆتىڭ قازاقستاندا ورىستىلدىلەر سانىنىڭ ازايىپ بارا جاتقانى تۋرالى مالىمدەمەسىن جوققا شىعارىپ وتىر، دەپ حابارلايدى “ادىرنا” ءتىلشىسى كازتاگ-قا سىلتەمە جاساپ.
«مۇمكىن، بۇل ادام ەلدە ءبىز بايقاعان اقپاراتتىڭ بارلىعىنان حاباردار بولماعان شىعار. مەندە ءبىلىم مينيسترلىگىنەن الىنعان دەرەكتەر بار، قاي مەكتەپتەردە قاي تىلدە وقىتىلادى. 7711 مەملەكەتتىك مەكتەپتىڭ 3957-ءسى تەك قازاق تىلىندە ءبىلىم بەرەدى. 1203 مەكتەپ ورىس تىلىندە. ال 2551 مەكتەپ قازاق جانە ورىس تىلىندە. سونىمەن قاتار، ەلىمىزدەگى بارلىق مەكتەپتەردى تەك قانا قازاق تىلىندە وقىتۋعا تولىق كوشىرۋ جوسپاردا جوق. بۇگىندە ازامات بالاسىنىڭ قاي تىلدە وقىتىلاتىنىن ءوزى تاڭداۋعا قۇقىلى»، - دەپ ءتۇسىندىردى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ بوبروۆتىڭ سوزىنە.
ول ديپلوماتتىڭ ءوزى رەسپۋبليكادان شىعىپ كەتكەنىن اتاپ ءوتتى.
بۇعان دەيىن بوبروۆ رەسەيلىك باق-قا «ورىس ءتىلىن قولدانۋ مەن ۇيرەنۋ دەڭگەيىنىڭ بەلگىلى ءبىر دەڭگەيدە تومەندەگەنىن» ايتقان ەدى.
