QR Syrtqy ister mınıstrligi Reseıdiń Almatydaǵy burynǵy bas konsýly Evgenıı Bobrovtyń Qazaqstanda orystildiler sanynyń azaıyp bara jatqany týraly málimdemesin joqqa shyǵaryp otyr, dep habarlaıdy “Adyrna” tilshisi KazTag-qa silteme jasap.
«Múmkin, bul adam elde biz baıqaǵan aqparattyń barlyǵynan habardar bolmaǵan shyǵar. Mende Bilim mınıstrliginen alynǵan derekter bar, qaı mektepterde qaı tilde oqytylady. 7711 memlekettik mekteptiń 3957-si tek qazaq tilinde bilim beredi. 1203 mektep orys tilinde. Al 2551 mektep qazaq jáne orys tilinde. Sonymen qatar, elimizdegi barlyq mektepterdi tek qana qazaq tilinde oqytýǵa tolyq kóshirý josparda joq. Búginde azamat balasynyń qaı tilde oqytylatynyn ózi tańdaýǵa quqyly», - dep túsindirdi QR Syrtqy ister mınıstrliginiń resmı ókili Aıbek Smadııarov Bobrovtyń sózine.
Ol dıplomattyń ózi respýblıkadan shyǵyp ketkenin atap ótti.
Buǵan deıin Bobrov reseılik BAQ-qa «orys tilin qoldaný men úırený deńgeıiniń belgili bir deńgeıde tómendegenin» aıtqan edi.
