اتىراۋدا 81 مۇعالىم جالعان قۇجاتپەن جۇمىس ىستەگەن. بۇل تۋرالى وبلىستىڭ سىبايلاس جەمقورلىققا قارسى قىزمەتىنىڭ پرەۆەنتسيا باسقارماسىنىڭ باسشىسى جانىبەك قاراجانوۆ ايتتى، دەپ حابارلايدى «ادىرنا» ءتىلشىسى.
ول ءبىلىم بەرۋ سالاسىندا سىبايلاس جەمقورلىقتىڭ ءجيى بولاتىنىن اتاپ ءوتتى.
«ءبىلىم سالاسىنداعى سىبايلاس جەمقورلىق تاۋەكەلدەرىنە سىرتقى تالداۋ جۇرگىزۋ كەزىندە كوپتەگەن كەمشىلىك انىقتالىپ وتىر. ماسەلەن، مەكتەپتەردە «ءولى جاندار» بار. قىزمەتكەرلەر مەن وقۋشىلار سانى بىردەي مەكتەپتەر ءارتۇرلى قارجىلاندىرىلعان. ءبىر قىزمەتكەر ءبىر مەزگىلدە 4-5 مەكەمەدە جۇمىس ىستەگەن. كەيبىر ءبىلىم بەرۋ مەكەمەسىندە باسشىلار وزدەرىنە لاۋازىمدىق جالاقىسىنا ۇستەمەاقى اۋدارىپ وتىرعان. مونيتورينگ ناتيجەسىندە مەكتەپكە دەيىنگى ءبىلىم بەرۋ مەكەمەلەرىندە 51, ورتا مەكتەپتەردە 30 قىزمەتكەردىڭ جالعان ديپلومدى پايدالانعانى انىقتالدى»، - دەدى ول.باسشى بۇل فاكتىلەردى جويۋ ءۇشىن وبلىستىق ءبىلىم باسقارماسىنا دەپارتامەنت ازىرلەگەن 26 ۇسىنىس جولدانعانىن مالىمدەدى.
«قىزمەتكەرلەردىڭ كونتينگەنتى بويىنشا دەرەكتەردى اۆتوماتتى تۇردە سالىستىرۋ ءۇشىن ينتەگراتسيانى قامتاماسىز ەتۋ قاجەت. جەرگىلىكتى اتقارۋشى ورگان دەڭگەيىندە بيۋدجەتتىك وتىنىمدەردى قالىپتاستىرۋ، بەكىتۋ پروتسەستەرىن اۆتوماتتاندىرعان ءجون. ءبىلىم بەرۋ مەكەمەلەرىنە كىرۋ، شىعۋ ۋاقىتىن فورماتتى-لوگيستيكالىق باقىلاۋدى بەلگىلەۋ مۇمكىندىگىمەن قىزمەتكەرلەرىنىڭ قاتىسۋىن باقىلاۋ سەكىلدى ۇسىنىستار بار»، - دەدى جانىبەك قاراجانوۆ.
ۇقساس جاڭالىقتار
