باق بەتتەرىندە ءماجىلىس دەپۋتاتى امانجول التاەۆ قىرعىز پرەزيدەنتى سادىر جاپاروۆتان ارعىماق مىنگەن اقىندى سىنادى دەگەن اقپارات تاراعان بولاتىن. بۇل اقپاراتتان كەيىن كوبى امانجول التاەۆ ءبىرجان قالدىباەۆتى قىزعاندى دەپ كىنالاۋدا. دەگەنمەن، اقىن بۇل تۋرالى Facebook پاراقشاسىنا جازبا قالدىردى.
ء“بىرجان قالدىباەۆ باۋىرىما جاناشىرلىقپەن ايتقان سىن پىكىرىمدى ۇدەتىپ ءتۇرلى سايتتار ءبىر - بىرىنەن كوشىرىپ الىپ شىعارىپ جاتىر ەكەن. جەلى قولدانۋشىلارى اراسىندا دا ماسەلەنىڭ بايىبىنا بارماي، مەنى قىزعانشاقتىق تانىتتى دەپ سان ساققا جۇگىرتىپ جاتقاندار دا بار ەكەن.
بۇگىن ءبىرجان باۋىرىممەن سويلەستىك. مەن اعالىق اقىلىمدى جەتكىزدىم، ول دا ىنىلىك ىزەتىمەن ءوز پىكىرىن ايتتى. ەڭ باستىسى ءبىر - ءبىرىمىزدى تۇسىندىك دەپ ويلايمىن. ماسەلەنى داۋعا اينالدىرماي نۇكتەسىن قويىپ، سىيلاستىقتى ساقتاۋعا ۋاعدالاستىق.
ءبىرجاننىڭ تۇلپار مىنگەنىنە قىزعانىشپەن قارادى دەگەن ەشقانداي قيسىنعا كەلمەيدى. باۋىرىمىزدىڭ تۇلپار مىنگەنىنە تەك قۋانىشپەن قارايمىن. ءوزىم دە وزگە ازاماتتارعا جىلىنا بىرنەشە تۇلپار مىنگىزىپ جۇرگەن ازاماتپىن. ءبىر ەلدىڭ اتىنان بارعاننان كەيىن ايتقان ارناۋى كوركەمدىك تالاپقا، ەستەتيكالىق تالعامعا، بايىپتى مازمۇنعا ساي بولسا ەكەن دەدىم”، دەپ جازدى ول.
ايتا كەتەيىك، قىرعىز پرەزيدەنتى سادىر جاپاروۆ قازاقستان ءماجىلىسىنىڭ دەپۋتاتى، ايتىسكەر اقىن امانجول التاەۆقا جاۋاپ بەردى.
“مەن الەۋمەتتىك جەلىلەردەن امانجول التاەۆ باۋىرىمىزدىڭ سوزدەرىن وقىدىم. بۇل ارينە، ىڭعايسىز ۇندەۋ بولدى.
بىرىنشىدەن، «ەلشى مەن جىرشىعا ءولىم جوق»، دەيدى. ەلشىلەر ەلشىلىگىن قىلادى. جىرشىلار، سونىڭ ىشىندە توكپە اقىندار قاي جەردە بولسا دا، ءوزىنىڭ ىڭعايىنا قاراي جىرلاي بەرەدى. سىناپ جىرلايدى، ماقتاپ جىرلايدى. بىردەڭە سۇراپ جىرلايدى. ودان كەمشىلىك پەن ساياسات ىزدەۋدىڭ كەرەگى جوق.
ەكىنشىدەن ءبىرجان قالدىباەۆ دەيتىن توكپە اقىن قىرعىزعا جيەن بولادى ەكەن. ال مەن قازاققا جيەنمىن. ەكەۋىمىز قايشىلاس جيەن ەكەنبىز. مەنىڭ بەسىنشى اتام سولتونقۇلدىڭ ايەلى ناۋشا اپامىز قازاق قىزى بولعان.
ۇشىنشىدەن، قازاق پەن قىرعىز ءسوز باققان ەلمىز. ەگەر مەن سول جەردە ارعىماق مىنگىزبەي قويسام، مەنى سوزگە جىعىپ جىرلايتىن ەدى. «بايكەم مەنى جاياۋ قايتاردى، بايكەمنىڭ ءبىر ارعىماقتىق ءالى جوق پا»، - دەۋشى ەدى. ەگەر مەن ول جيىنعا قاتىسپاسام، ءسوز باسقا بولار ەدى.
سوندىقتان، امانجول مىرزاعا ايتارىم، ەشقانداي ىڭعايسىز جاعدايدا قالعان جوقسىزدار. ەشقانداي ساياساتى دا جوق. بولعانى – توكپە اقىن جيەنىمنىڭ سوزىنە قالمايىن دەپ، ارعىماق مىنگىزدىم. ال ەندى ءبىرجان قالدىباەۆتىڭ قانداي اقىن ەكەنىن مەن دە بىلمەيمىن. بۇرىننان تانىس ەمەسپىن. ونى كوشەدەگى جۇرگەن ءبىر اقىن دەپتى. قازىر كوشەدەگى ءبىر اقىن بولسا، كەيىن قازاق پەن قىرعىزعا تانىمال اقىن بولاتىن شىعار. «بەسىكتەگى بالانىڭ بەك بولارىن كىم بىلەدى، قارىنداعى بالانىڭ حان بولارىن كىم بىلەدى»، دەيدى. جاس بالا ەكەن. قولداۋ جاساساڭدار، كەيىن تانىمال، مىقتى اقىن بولاتىن شىعار.
ءبىز قازاق پەن قىرعىزدى وزىمىزدەن باسقا ەشكىم قولدامايدى. ءبىر-ءبىرىمىزدى قولدايىق. قازىرگى الەمدەگى احۋال قيىن بولىپ تۇر. قازاق پەن قىرعىزدىڭ ورتاسىنا شوق تاستاپ جىبەرسەك دەپ تۇرعان ءۇشىنشى كۇشتەر بار. ءبىز وعان جول بەرمەۋىمىز كەرەك. ورتاداعى ىنتىماقتى ساقتايىق. ونسىز دا از حالىقتارمىز”، - دەدى قىرعىزستان پرەزيدەنتى.
اقىن امانجول التاەۆ قىرعىزستان پرەزيدەنتىنىڭ ىستىق ىقىلاسىن العانىن دا مالىمدەدى.
ەسكە سالايىق، 13 تامىزدا قالدىباەۆ شولپان-اتادا وتكەن كوكپاردان الەم كۋبوگىنىڭ اشىلۋ سالتاناتىندا ءسوز سويلەپ، ەكى حالىقتىڭ دوستىعى تۋرالى ءان شىرقاعان.
سودان كەيىن جاپاروۆ بىشكەكتە اقىنعا ونى سىيلىق كۇتىپ تۇرعانىن ايتقان ەدى. ال 20 تامىزدا پرەزيدەنتتىڭ ءىس باسقارۋشىسى قانىبەك تۇمونباەۆ اقىنعا مەملەكەت باسشىسىنىڭ سىيلىعىن تاپسىردى.
