قىرعىزستان پرەزيدەنتى سادىر جاپاروۆ مەملەكەت باسشىسى قاسىم-جومارت توقاەۆقا كورنەكتى قازاق اقىنىنىڭ قازاسىنا بايلانىستى كوڭىل ايتۋ جەدەلحاتىن جولدادى، دەپ حابارلايدى "ادىرنا".
"قىرعىز رەسپۋبليكاسىنىڭ پرەزيدەنتى سادىر جاپاروۆ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا كورنەكتى قازاق اقىنى، دراماتۋرگ، قوعام قايراتكەرى، قازاقستاننىڭ حالىق جازۋشىسى مۇحتار شاحانوۆتىڭ قايتىس بولۋىنا بايلانىستى كوڭىل ايتۋ جەدەلحاتىن جولدادى", – دەپ جازىلعان رەسمي سايتتاعى كوڭىلقوستا.
مۇحتار شاحانوۆ قازاقستاننىڭ قىرعىزستانداعى تۇڭعىش ەلشىسى بولدى. ءارى قىرعىز جازۋشىسى شىڭعىس ايتماتوۆتىڭ دوسى ەدى.
"مۇحتار اعا باۋىرلاس قازمۇحتۆاق حالقىنىڭ عانا ەمەس، قالىڭ قىرعىز ەلىنىڭ دە اقساقالى، سۇيەنەر تىرەگى ەدى. دەمەك، قىرعىز جۇرتشىلىعى تاعى ءبىر اسقار تاۋىنان، تاعى ءبىر رۋحاني تىرەگىنەن ايىرىلىپ، ەڭسەسى ءتۇسىپ، جۇرەگى قان جىلاپ تۇرعان ءسات. مۇنداي الىپ تۇلعالاردىڭ باقيلىق بولۋى جايلى حالقىمىزدا "بىلگەنگە تۇتاس ءبىر ءداۋىر كەتتى" دەيدى. شىنىندا دا، مۇحتار اعانىڭ ماڭگىلىك ساپارعا اتتانۋىمەن كۇللى تۇركى الەمى ءبىر داۋىرىنەن ايىرىلدى...
قازاق بابالارىمىزدىڭ ادىلدىك ءۇشىن جانىن ايامايتىن ءور مىنەزىن بويىنا سىڭىرگەن مۇحتار اعا سوناۋ كەڭەس داۋىرىندە دە، ودان كەيىن دە وتان تاعدىرى ءۇشىن باسىن بايگەگە تىگىپ، شىندىقتى تايسالماي ايتىپ كەلگەنى الىس-جاقىنعا ءمالىم. قۋعىن-سۇرگىنگە ۇشىراسا دا، مويىماي، "جەلتوقسان وقيعاسى" تۋرالى ءوز پىكىرىن باتىل بىلدىرگەنى جادىمىزدا", – دەپ جازادى سادىر جاپاروۆ.
اقىن تۇيەنىڭ قوس وركەشىندەي قازاق پەن قىرعىزعا بىردەي جاناشىر بولا ءبىلدى.
"وسىنداي دارىندى، ەلجاندى ۇلىنان ايىرىلىپ، قايعى جامىلعان قازاق جۇرتىنا، اقىننىڭ تۋعان-تۋىستارىنا شىن كوڭىلىممەن قايعىرىپ، كوڭىل ايتامىن.
قايرات تانىتىپ، سابىر ساقتاڭىزدار!", – دەلىنگەن قىرعىز رەسپۋبليكاسى مەملەكەت باسشىسىنىڭ جەدەلحاتىندا.
