قىرعىزستان پرەزيدەنتى سادىر جاپاروۆ كونستيتۋتسيالىق سوتقا مەملەكەت باسشىسىن كەزەكتى جانە مەرزىمىنەن بۇرىن سايلاۋ ءتارتىبى مەن مەرزىمدەرىنە قاتىستى كونستيتۋتسيانىڭ بىرقاتار باپتارىنا رەسمي تۇسىندىرمە بەرۋ تۋرالى ءوتىنىش جولدادى، دەپ حابارلايدى «ادىرنا» ءتىلشىسى Fergana News-كە سىلتەمە جاساپ.
ايتىلعانداي، مۇنداي ءتۇسىندىرۋ قاجەتتىلىگى ساراپشىلار ورتاسىندا جانە قوعامداعى تالقىلاۋلاردا قولدانىستاعى نورمالاردىڭ ءارتۇرلى تۇسىندىرىلۋىنە بايلانىستى تۋىنداعان. سونىڭ سالدارىنان پرەزيدەنت وكىلەتتىگىنىڭ مەرزىمىنە قاتىستى قاراما-قايشى پىكىرلەر پايدا بولعان.
وتىنىشتە 2021 جىلعى 11 ساۋىردە وتكەن رەفەرەندۋمدا قابىلدانعان جاڭا كونستيتۋتسيانىڭ كەيبىر ەرەجەلەرى پرەزيدەنتتىك مەرزىمنىڭ باستالۋى مەن ۇزاقتىعىن ءارتۇرلى تۇسىندىرۋگە مۇمكىندىك بەرەتىنى اتاپ وتىلەدى. بۇل ءوز كەزەگىندە قۇقىقتىق بەلگىسىزدىك تۋعىزىپ، مەملەكەتتىك ورگانداردىڭ تۇراقتى جۇمىس ىستەۋىنە اسەر ەتۋى مۇمكىن. اتالعان ماسەلە كونستيتۋتسيالىق قۇرىلىمنىڭ نەگىزدەرىنە، حالىق بيلىگى قاعيداتىنا، نەگىزگى زاڭنىڭ ۇستەمدىگىنە، سونداي-اق ازاماتتاردىڭ سايلاۋ قۇقىقتارىنا تىكەلەي قاتىستى.
جاپاروۆتىڭ ايتۋىنشا، كەلىسپەۋشىلىكتەر ساقتالسا، قۇقىقتىق ماسەلە ساياسي دەڭگەيگە اۋىسىپ، مەملەكەتتىك ينستيتۋتتارعا دەگەن سەنىمدى السىرەتۋى جانە قوعامداعى الەۋمەتتىك شيەلەنىستى كۇشەيتۋى ىقتيمال. سوندىقتان ول كونستيتۋتسيالىق سوتتان رەسمي تۇسىندىرمە بەرۋدى سۇراپ، كونستيتۋتسيالىق داعدارىس قاۋپىن بولدىرماۋدى ماقسات ەتكەن.
كونستيتۋتسيالىق سوتتىڭ ءباسپاسوز قىزمەتىنىڭ مالىمەتىنشە، پرەزيدەنتتىڭ ءوتىنىشى جەدەل تارتىپتە قارالادى. كونستيتۋتسيالىق سوتتىڭ وتىرىسى 17 اقپانعا بەلگىلەنگەن.
بۇل ءوتىنىش جاپاروۆقا جانە پارلامەنت سپيكەرىنە جولدانعان حات جاريالانعاننان كەيىن ەكى كۇن وتكەن سوڭ جىبەرىلگەن. اتالعان حاتتا مەملەكەت باسشىسىنىڭ جاڭا سايلاۋىن شۇعىل تۇردە باستاۋ تۋرالى ۇسىنىس ايتىلعان. حاتقا 75 ادام، ونىڭ ىشىندە بۇرىنعى پرەمەر-مينيسترلەر، عالىمدار، ەكس-دەپۋتاتتار مەن قوعام قايراتكەرلەرى قول قويعان. ولار 2021 جىلى جاڭا كونستيتۋتسيا قابىلدانعاننان كەيىن بۇرىنعى ەرەجەلەر بويىنشا سايلانعان قازىرگى پرەزيدەنتتىڭ وكىلەتتىك مەرزىمىنە قاتىستى قۇقىقتىق بەلگىسىزدىك پايدا بولدى دەپ ەسەپتەيدى. ايتۋلارىنشا، مەرزىمىنەن بۇرىن سايلاۋ وتكىزۋ داۋلار مەن ەكىۇشتى تۇسىندىرۋلەردىڭ الدىن الار ەدى.
