BAQ betterınde Mäjılıs deputaty Amanjol Ältaev Qyrǧyz prezidentı Sadyr Japarovtan arǧymaq mıngen aqyndy synady degen aqparat taraǧan bolatyn. Būl aqparattan keiın köbı Amanjol Ältaev Bırjan Qaldybaevty qyzǧandy dep kınälauda. Degenmen, aqyn būl turaly Facebook paraqşasyna jazba qaldyrdy.
“Bırjan Qaldybaev bauyryma janaşyrlyqpen aitqan syn pıkırımdı üdetıp türlı saittar bır - bırınen köşırıp alyp şyǧaryp jatyr eken. Jelı qoldanuşylary arasynda da mäselenıŋ baiybyna barmai, menı qyzǧanşaqtyq tanytty dep san saqqa jügırtıp jatqandar da bar eken.
Bügın Bırjan bauyrymmen söilestık. Men aǧalyq aqylymdy jetkızdım, ol da ınılık ızetımen öz pıkırın aitty. Eŋ bastysy bır - bırımızdı tüsındık dep oilaimyn. Mäselenı dauǧa ainaldyrmai nüktesın qoiyp, syilastyqty saqtauǧa uaǧdalastyq.
Bırjannyŋ tūlpar mıngenıne qyzǧanyşpen qarady degen eşqandai qisynǧa kelmeidı. Bauyrymyzdyŋ tūlpar mıngenıne tek quanyşpen qaraimyn. Özım de özge azamattarǧa jylyna bırneşe tūlpar mıngızıp jürgen azamatpyn. Bır eldıŋ atynan barǧannan keiın aitqan arnauy körkemdık talapqa, estetikalyq talǧamǧa, baiypty mazmūnǧa sai bolsa eken dedım”, dep jazdy ol.
Aita keteiık, Qyrǧyz prezidentı Sadyr Japarov Qazaqstan Mäjılısınıŋ deputaty, aitysker aqyn Amanjol Ältaevqa jauap berdı.
“Men äleumettık jelılerden Amanjol Ältaev bauyrymyzdyŋ sözderın oqydym. Būl ärine, yŋǧaisyz ündeu boldy.
Bırınşıden, «elşı men jyrşyǧa ölım joq», deidı. Elşıler elşılıgın qylady. Jyrşylar, sonyŋ ışınde tökpe aqyndar qai jerde bolsa da, özınıŋ yŋǧaiyna qarai jyrlai beredı. Synap jyrlaidy, maqtap jyrlaidy. Bırdeŋe sūrap jyrlaidy. Odan kemşılık pen saiasat ızdeudıŋ keregı joq.
Ekınşıden Bırjan Qaldybaev deitın tökpe aqyn qyrǧyzǧa jien bolady eken. Al men qazaqqa jienmın. Ekeuımız qaişylas jien ekenbız. Menıŋ besınşı atam Soltonqūldyŋ äielı Nauşa apamyz qazaq qyzy bolǧan.
Üşınşıden, qazaq pen qyrǧyz söz baqqan elmız. Eger men sol jerde arǧymaq mıngızbei qoisam, menı sözge jyǧyp jyrlaityn edı. «Baikem menı jaiau qaitardy, baikemnıŋ bır arǧymaqtyq älı joq pa», - deuşı edı. Eger men ol jiynǧa qatyspasam, söz basqa bolar edı.
Sondyqtan, Amanjol myrzaǧa aitarym, eşqandai yŋǧaisyz jaǧdaida qalǧan joqsyzdar. Eşqandai saiasaty da joq. Bolǧany – tökpe aqyn jienımnıŋ sözıne qalmaiyn dep, arǧymaq mıngızdım. Al endı Bırjan Qaldybaevtyŋ qandai aqyn ekenın men de bılmeimın. Būrynnan tanys emespın. Ony köşedegı jürgen bır aqyn deptı. Qazır köşedegı bır aqyn bolsa, keiın qazaq pen qyrǧyzǧa tanymal aqyn bolatyn şyǧar. «Besıktegı balanyŋ bek bolaryn kım bıledı, qaryndaǧy balanyŋ han bolaryn kım bıledı», deidı. Jas bala eken. Qoldau jasasaŋdar, keiın tanymal, myqty aqyn bolatyn şyǧar.
Bız qazaq pen qyrǧyzdy özımızden basqa eşkım qoldamaidy. Bır-bırımızdı qoldaiyq. Qazırgı älemdegı ahual qiyn bolyp tūr. Qazaq pen qyrǧyzdyŋ ortasyna şoq tastap jıbersek dep tūrǧan üşınşı küşter bar. Bız oǧan jol bermeuımız kerek. Ortadaǧy yntymaqty saqtaiyq. Onsyz da az halyqtarmyz”, - dedı Qyrǧyzstan prezidentı.
Aqyn Amanjol Ältaev Qyrǧyzstan prezidentınıŋ ystyq yqylasyn alǧanyn da mälımdedı.Eske salaiyq, 13 tamyzda Qaldybaev Şolpan-Atada ötken kökpardan älem Kubogynyŋ aşylu saltanatynda söz söilep, ekı halyqtyŋ dostyǧy turaly än şyrqaǧan.
Sodan keiın Japarov Bışkekte aqynǧa ony syilyq kütıp tūrǧanyn aitqan edı. Al 20 tamyzda Prezidenttıŋ ıs basqaruşysy Qanybek Tūmonbaev aqynǧa memleket basşysynyŋ syilyǧyn tapsyrdy.
