قوعامدا اقىن-جازۋشىلاردىڭ مەرەيتويلارىن وتكىزۋگە قاتىستى ءتۇرلى پىكىرلەر ايتىلىپ ءجۇر. سولاردىڭ كەيبىرى الەۋمەتتىك جەلىلەر ارقىلى «جازارىن جازىپ، حالىققا كىتاپ ارقىلى بەرەرىن بەرىپ قويعان اقىن-جازۋشىلاردىڭ مەرەيتويىن قارجى شىعىنداپ وتكىزە بەرگەننەن پايدا بار ما؟» دەگەنگە ساياتىن پىكىرلەرىن جاريالاپ جاتىر. وسىعان قاتىستى «ادىرنا» ۇلتتىق پورتالىنىڭ ءتىلشىسى قازاقستان جازۋشىلار وداعىنىڭ توراعاسى مەرەكە قۇلكەنوۆپەن اڭگىمەلەسكەن ەدى.
- مەرەكە اعا، قازىرگى تاڭدا، قوعامدا اقىن-جازۋشىلاردىڭ مەرەيتويلىق داتالارىنا قاتىستى ءارتۇرلى سىني پىكىرلەردى ەستىپ قالامىز. قالامگەرلەردىڭ مەرەيتويلىق داتالارى ارقىلى شىعارمالارىنىڭ ناسيحاتتالۋىن قولدايتىندار دا بار. بىراق، كەرىسىنشە «مۇنىڭ بارلىعى ارتىق شىعىن، ومىردەن وتكەن اقىن-جازۋشىلاردىڭ ەڭبەكتەرى كىتاپتارىندا تۇر. كەرەك ەتكەندەر ىزدەنىپ، وقىپ الادى. ال ءتۇرلى ماعىناسىز جيىندار، كونفەرەنتسيالار وتكىزۋ، ءبىر شىققان كىتاپتاردى قايتا شىعارۋ – اقشانى جەلگە شاشۋ» دەيتىندەر دە كەزدەسەدى. جازۋشىلار وداعىنىڭ توراعاسى رەتىندە بۇل ماسەلەگە قاتىستى ويىڭىزدى بىلسەك دەپ ەدىك.
- وزدەرىڭىز بىلەسىز، جازۋشىلار وداعى 800-گە جۋىق اقىن-جازۋشىنىڭ باسىن قوسىپ وتىرعان ەڭ ءىرى شىعارماشىلىق ۇيىم. جازۋشىلار وداعى تەك كوز ءتىرى شىعارما يەلەرىنىڭ عانا ماسەلەسىمەن اينالىسىپ، ەڭبەكتەرىن دارىپتەيتىن ۇيىم ەمەس. جازۋشىلار وداعى ەڭ الدىمەن – ۇلتتىق ادەبيەتكە قىزمەت ەتەدى.
ۇلتتىق ادەبيەتىمىزدىڭ باستاۋىندا – كەشەگى ومىردەن ءوتىپ كەتكەن كلاسسيكتەرىمىز تۇر. سوندىقتان ءبىز قازاق ادەبيەتىنىڭ بارلىق جارقىن تۇلعالالارىن ەسكە الامىز. جىل سايىن ومىردەن ءوزى وتسە دە، ارتىندا ولمەس ءسوزى قالعان زيالىلارىمىزدىڭ مەرەيتويلىق داتاسىن شامامىز جەتكەنشە اتاپ وتەمىز. بۇل – بۇگىنگى بۋىننىڭ پارىزى دەپ بىلەمىن. قالامگەرلەردىڭ مەرەيتويىن اتاپ ءوتۋ ارقىلى ءبىز اقىن-جازۋشىلاردىڭ شىعارماسىن، جارقىن تۇلعاسىن – وقىرمان جادىندا قايتا جاڭعىرتامىز. جاڭا بۋىن وسكەلەڭ ۇرپاققا – ولاردىڭ ەڭبەگىن، شىعارمالارىن تانىستىرامىز. ودان ۇرپاق ۇتىلا قويمايدى دەپ ويلايمىن.
- بيىل وداق قانداي قالامگەرلەردىڭ مەرەيتويىن اتاپ ءوتىپ جاتىر؟
- بيىل بىرقاتار اقىن-جازۋشىنىڭ عاسىرلىق تويى. اتاپ ايتقاندا، جازۋشى-دراماتۋرگ – تاحاۋي احتانوۆ، قازاق ادەبيەتىندە دەتەكتيۆ جانرىنىڭ نەگىزىن قالاعان – كەمەل توقاەۆ، بالالار ادەبيەتىنىڭ كلاسسيگى – مۇزافار الىمباەۆ، سونىمەن قاتار كورنەكى قالامگەرلەر اسكەن نابيەۆ، وتەباي قاناحيندەردىڭ 100 جىلدىعى تويلانىپ جاتىر. وسى اعالارىمىزدىڭ بارلىعىنىڭ دا مەرەيلى مەرەكەسىن جازۋشىلار وداعى ۇمىت قالدىرماي، ءار وڭىردەگى فيليالدارىمىز ارقىلى كەڭ كولەمدە اتاپ وتۋگە تىرىسىپ جاتىرمىز. سونىمەن قاتار، ءاربىر اقىن-جازۋشىنىڭ تۋعان ەلىندە دە – جەرلەستەرى، ۇرپاقتارى ات سالىسىپ، وعان دەمەۋشىلەر قوسىلىپ ءىس-شارالاردىڭ اۋقىمىن كەڭەيتۋگە سەپتەسىپ جاتىر. جاڭاعى ايتقانىمداي، وسىنداي ءىس-شارالار ارقىلى ءبىز ومىردەن وتكەن جازۋشىلارىمىزدىڭ ەسىمىن، ەڭبەگىن حالىقتىڭ جادىندا قايتا جاڭعىرتامىز.
- «قالامگەرلەردىڭ مەرەيتويىنا قاتىستى ماعىناسىز جيىندار، كونفەرەنتسيالار وتكىزۋ، ءبىر شىققان كىتاپتاردى قايتا شىعارۋ اقشانى جەلگە شاشۋ» دەيتىندەرگە نە ايتاسىز؟
- ولارعا نە ايتايىن؟ قازاق حالقىنىڭ رۋحانياتى ءۇشىن تەر توككەن قالامگەرلەردىڭ شىعارماشىلىعىنا قاتىستى ۇيىمداستىرىلاتىن كونفەرەنتسيالاردى ماعىناسىز جيىن دەۋ ادىلدىك ەمەس. بۇنداي شارالار اسىرەسە – وسكەلەڭ ۇرپاققا قاجەت. ءتۇرلى كونفەرەنتسيا، باس قوسۋلارعا قاتىسقان جاستار، جالپى وقىرمان – جازۋشىنىڭ تۇلعاسىن تەرەڭنەن تانيدى، شىعارمالارىمەن تانىسادى. بۇل ولاردىڭ ۇلتتىق ادەبيەتىمىزگە دەگەن قىزىعۋشىلىقتارىن وياتۋعا اسەر ەتەتىنى ءسوزسىز. سول سەبەپتى، قانداي پىكىر ايتىلسا دا، مەرەيتويلىق شارالاردى ۇيىمداستىرۋدى الداعى ۋاقىتتا دا جالعاستىرا بەرەمىز. سەبەبى بۇل – ۇلتتىق رۋحانياتىمىزعا قاجەت دۇنيە. سوندىقتان مۇنداي شارالارعا قارسى جاندارعا رۋحانياتتى اقشامەن ەمەس، ءىس-شارانىڭ مازمۇنى مەن ماڭىزىمەن ولشەۋگە، كەڭەس بەرەر ەدىم.
”ادىرنا” ۇلتتىق پورتالى
