"قاراۋسىز قالعان". شىمكەنتتەگى توعاننان ەكى ءبۇلدىرشىننىڭ ءمايىتى تابىلدى

شىمكەنتتە توعاننان  ەكى ءبۇلدىرشىننىڭ دەنەسى تابىلدى. ولار اتا-اناسى تاراپىنان قاراۋسىز قالعان، دەپ حابارلايدى "ادىرنا" ۇلتتىق پورتالى.  باقىلاۋسىز قالعان بۇلدىرشىندەر توعانعا ءتۇسىپ كەتكەن.قاراتاۋ اۋدانى، گەولوگتار ساياجايىنداعى كانال سۋىنان 2 جاسار ءبۇلدىرشىننىڭ ءمايىتى تابىلدى. تەرەڭدىگى 50 سم، ەنى 1,5 مەتر بولاتىن سۋارۋ كانالىنا تۇسكەن تۇرعىندار 2021 جىلى تۋعان بالانىڭ دەنەسىن الىپ شىقتى. ەكىنشى جازاتايىم وقيعا اباي اۋدانى، الماتى تاس جولى بويىندا بولعان. كوشەدەن ءوتىپ بارا جاتقان ادامدار قالالىق تازارتۋ جۇيەسىنەن ءبىر جاستاعى قىزدىڭ ءمايىتىن كورىپ قالعان. تازارتۋ جۇيەسىنىڭ تەرەڭدىگى 40 سم، ەنى 1 مەتردى قۇرايدى.

«ەكى جاعدايدا دا بۇلدىرشىردەر اتا-اناسىنىڭ قاراۋىنسىز قالعان. سوندىقتان اتا- انالاردان بالارىن قاراۋسىز قالدىرماۋدى سۇرانامىز!»-دەلىنگەن شىمكەنت قالاسى تجد قوعاممەن بايلانىس توبى تاراتقان اقپاراتتا.

جۋرناليست ايگۇل بولاتحانقىزى وسىنداي جايتتاردىڭ كوبەيىپ كەتكەنىن ايتىپ، بالالاردىڭ سىرتقى ورتادا قاراۋسىز قالاتىنىن ءسوز ەتىپ، كەي انا-انالاردى الەۋمەتتىك جەلىدە سىنعا الدى:

- بالا زورلاندى دەگەندى ءجيى ەستيمىز عوي. ءدال قازىر تۇنگى 12-دەن استى. كورشى اۋلادا قىشقىرىپ شىڭعىرىپ كىشكەنتاي بالالار ويناپ ءجۇر (؟). زورلاسا دا، ءولتىرىپ كەتسە دە جانىم اشىماس ەدى مۇنداي بالاعا دا، اكە-شەشەسىنە دە. شىنىم! شىعىپ اكەسىنە تانىتىپ كەلەيىن دەسەم، اناۋ جاقتا ءارى ەرىنىپ تۇرمىن. سول اۋلاداعى ۇيلەردىڭ ۇلكەندەرى تۇگەل قىرىلىپ قالعان با، ءتايت دەيتىن ءبىرى جوق. ال نە دەيسىڭ؟ - دەدى جۋرناليست.

P.S. "ادىرنا" ۇلتتىق پورتالى بارشا اتا-انالاردىڭ سەرگەك بولۋىن، بالالارىنا كوز قىرىن سالىپ، باقىلاپ ءجۇرۋدى ءوتىنىپ سۇرايدى.

"ادىرنا" ۇلتتىق پورتالى