اينۇر تۇرسىنباەۆا: "اللاعا سەنگەنى ءۇشىن كىنالاۋ – ساۋاتسىزدىق"

نۇر-سۇلتان، 19 ءساۋىر – Sputnik. اللاعا سەنگەنى ءۇشىن ادامدى سەكتانت دەپ قارالاۋ – قيسىنسىز ساۋاتسىزدىق. ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ايتىسكەر اقىن اينۇر تۇرسىنباەۆا وسىنداي پىكىر ايتتى، دەپ حابارلايدى Sputnik قازاقستان تىلشىسى.

اينۇر تۇرسىنباەۆا حالىق اراسىندا كەيبىر اقىندار تۋرالى تاراعان الىپ-قاشپا اڭگىمەگە توقتالدى.

"ماسەلەن، مەن قازىر بالعىنبەك يماشەۆ بيگە بارىپ ءجۇر دەسەم، قيسىنعا كەلمەيدى عوي. ءدىني سەكتاعا كەتىپ جاتىر دەگەن سوزگە بىردە-ءبىر ادام دالەل كەلتىرە المايدى. بالعىنبەك بەس ۋاقىت نامازىن وقيدى، قاجىلىققا بارىپ كەلدى. مەن مەككەگە بارىپ كەلدىم. بىراق مۇنداي نارسەلەر ءدىني سەكتانىڭ جەتەگىندە كەتىپ ءجۇر دەگەن اڭگىمەگە نەگىز بولا المايدى", - دەيدى ايتىسكەر اقىن "ۇلى دالا ءان مەن جىرى، اقىندىقتىڭ جەتى قىرى" اتتى رەسپۋبليكالىق تۋرعا ارنالعان ءباسپاسوز ءماسليحاتىندا.

ول اقىندارعا جالا جاۋىپ جۇرگەن ادامداردىڭ ەشقايسىسى ناقتى دالەل كەلتىرە المايتىنىن اتاپ ءوتتى.

"اللاعا سەنگەنى ءۇشىن، اللانى سۇيگەنى ءۇشىن ادامدى سەكتانت دەپ قارالاپ، كىنالاۋ مۇلدە قيسىنسىز ساۋاتسىزدىق دەپ ويلايمىن. بىزگە جالا جاۋىپ جاتقان ادامداردىڭ قاي-قايسىسىنان تىكەلەي سۇراساڭ، ەشكىم دالەلدەي المايدى. "بىلمەيمىن، حالىق ايتىپ ءجۇر عوي" دەي سالادى", - دەپ اشىندى اقىن.

"ايتىستا وتباسىمنىڭ ماسەلەسىن ەشقاشان كوتەرگەن ەمەسپىن"

تۇرسىنباەۆا اقىندار ايتىستا الەۋمەتتىك ماسەلەلەردى كوتەرمەيدى دەگەن ساۋالعا قاتىستى دا جاۋاپ بەردى.

"وتىز جىل بويى ايتىستا مەن ءوز وتباسىمنىڭ ماسەلەسىن ەشقاشان كوتەرىپ كورگەن ەمەسپىن. قاي-قايسىمىزدىڭ ايتىسىن الىپ قاراساڭىز، ءتىل مەن ءدىننىڭ جايى، ەل مەن جەردىڭ داۋى قوزعالادى. الەۋمەتتىك ماسەلە قوزعالماعان ايتىستى 28 جىلدا بىردە-ءبىر رەت جاساپ كورگەن ەمەسپىز. ءتۇرلى كۆن، ءازىل-قالجىڭ، قاي جەردە وتىرساق تا، ءبىز ءوزىمىزدىڭ اقىن دەگەن اتىمىزعا كىر كەلتىرگەن ەمەسپىز. حالىق نەنى ەستىگىسى كەلەدى، ءبىز سونى ايتىپ كەلە جاتىرمىز دەپ ويلايمىن", - دەدى ايتىسكەر اقىن.