NUR-SULTAN, 19 sáýir – Sputnik. Allaǵa sengeni úshin adamdy sektant dep qaralaý – qısynsyz saýatsyzdyq. Ortalyq kommýnıkaııalar qyzmetinde ótken baspasóz máslıhatynda aıtysker aqyn Aınur Tursynbaeva osyndaı pikir aıtty, dep habarlaıdy Sputnik Qazaqstan tilshisi.
Aınur Tursynbaeva halyq arasynda keıbir aqyndar týraly taraǵan alyp-qashpa áńgimege toqtaldy.
"Máselen, men qazir Balǵynbek Imashev bıge baryp júr desem, qısynǵa kelmeıdi ǵoı. Dinı sektaǵa ketip jatyr degen sózge birde-bir adam dálel keltire almaıdy. Balǵynbek bes ýaqyt namazyn oqıdy, qajylyqqa baryp keldi. Men Mekkege baryp keldim. Biraq mundaı nárseler dinı sektanyń jeteginde ketip júr degen áńgimege negiz bola almaıdy", - deıdi aıtysker aqyn "Uly dala án men jyry, aqyndyqtyń jeti qyry" atty respýblıkalyq týrǵa arnalǵan baspasóz máslıhatynda.
Ol aqyndarǵa jala jaýyp júrgen adamdardyń eshqaısysy naqty dálel keltire almaıtynyn atap ótti.
"Allaǵa sengeni úshin, Allany súıgeni úshin adamdy sektant dep qaralap, kinálaý múlde qısynsyz saýatsyzdyq dep oılaımyn. Bizge jala jaýyp jatqan adamdardyń qaı-qaısysynan tikeleı surasań, eshkim dáleldeı almaıdy. "Bilmeımin, halyq aıtyp júr ǵoı" deı salady", - dep ashyndy aqyn.
"Aıtysta otbasymnyń máselesin eshqashan kótergen emespin"
Tursynbaeva aqyndar aıtysta áleýmettik máselelerdi kótermeıdi degen saýalǵa qatysty da jaýap berdi.
"Otyz jyl boıy aıtysta men óz otbasymnyń máselesin eshqashan kóterip kórgen emespin. Qaı-qaısymyzdyń aıtysyn alyp qarasańyz, til men dinniń jaıy, el men jerdiń daýy qozǵalady. Áleýmettik másele qozǵalmaǵan aıtysty 28 jylda birde-bir ret jasap kórgen emespiz. Túrli KVN, ázil-qaljyń, qaı jerde otyrsaq ta, biz ózimizdiń aqyn degen atymyzǵa kir keltirgen emespiz. Halyq neni estigisi keledi, biz sony aıtyp kele jatyrmyz dep oılaımyn", - dedi aıtysker aqyn.
Sputnik.
