24 مامىر كۇنى الماتى قالاسى “الاتاۋ” ءداستۇرلى ونەر تەاترىندا «كوپتەن كۇتكەن كەزدەسۋ» تاقىرىبىندا باۋىرجان مومىشۇلىنىڭ كەلىنى، «شۋاقتى كۇندەر»، «بابالار اماناتى»، «كۇرەتامىر» كىتاپتارىنىڭ اۆتورى، جازۋشى، قوعام قايراتكەرى زەينەپ احمەتوۆامەن كەزدەسۋ ءوتتى، دەپ حابارلايدى “ادىرنا” ۇلتتىق پورتالى.
الماتى قالاسى اكىمدىگى مادەنيەت باسقارماسى مەن “ادىرنا” ۇلتتىق-ەتنوگرافيالىق بىرلەستىگى قوعامدىق قورى بىرلەسىپ ۇيىمداستىرعان شارادا زەينەپ احمەتوۆا ۇلتتىق تاربيە، رۋحاني قۇندىلىق، سالت-ءداستۇر، ەنە مەن كەلىن اراسىنداعى سىيلاستىق، بالا تاربيەسى تۋرالى ءوزىنىڭ ومىردەن تۇيگەن تاجىريبەسىنەن كەڭىنەن اڭگىمەلەدى.
سونداي-اق، قالام مەن قارۋدى قاتار ۇستاعان باتىر بابا باۋىرجان مومىشۇلىنىڭ ءومىرى، ونىڭ وسيەتتەرى مەن ەستە قالارلىق قىزىقتى وقيعالارىمەن ءبولىستى.
«اتامنىڭ ارقاسىندا بۇگىنگى دارەجەگە جەتىپ، ەل ىشىندە ەركەلەپ ءجۇرمىن» دەگەن ول، بارلىق ماقتاۋ-ماداقتاۋ وزىنە ەمەس، باتىر اتامىزعا ايتىلدى دەپ قابىلدايتىنىن جەتكىزدى.
كەشتى “ادىرنا” ۇلتتىق ەتنوگرافيالىق بىرلەستىگىنىڭ جەتەكشىسى ارمان اۋباكىر تىزگىندەدى. سونداي-اق، شارا بارىسىندا ءداستۇرلى ءانشى ەرلان تولەۋتاي ءانىن شىرقادى.
ەل اناسىنىڭ ۇلاعاتقا تولى عيبراتتى اڭگىمەلەرىن تىڭداۋعا كەلگەن كورەرمەن قاراسى قالىڭ. كومپوزيتور قالدىبەك قۇرمانالى، قوعام قايراتكەرى، ابايتانۋشى ءادىل نەسىپباەۆ، قازاقستاننىڭ ەڭبەك سىڭىرگەن قايراتكەرى اسىلى وسمان سىندى حالىق قالاۋلىلارى قوناق بولدى. جينالعان قاۋىم اراسىنان سۇراقتار قويىلىپ، ىستىق لەبىز، ارناۋ-تىلەكتەرى ايتىلدى.
ءۇش جارىم ساعات حالىقپەن سىرلاسىپ، كەلەلى كەزدەسۋ وتكىزگەن زەينەپ احمەتوۆاعا كەش سوڭىندا سىي-سىياپات تابىستالدى. قۇتتىقتاۋ سوزىمەن ورتاعا شىققان الماتى قالاسى اكىمدىگى مادەنيەت باسقارماسىنىڭ مادەني كوپشىلىك ءىس-شارالار ءبولىمىنىڭ باسشىسى ارمان حالبەكوۆ زەينەپ احمەتوۆاعا كامزول كيگىزىپ، ورامال جاپتى.
