Ǵalymjan Jaqııanov - bul esim-soıdy muqym qazaq qurmet tutady. Onyń eki myńynshy jyldardan beri avtorıtarly bıliktiń degenine kónbeı, Qazaqstandy demokratııalyq memleket etý jolynda aıanbaı kúresip kele jatqanyn, tipti saıası kózqarasy úshin abaqtyǵa da qamalǵanyn eshkim joqqa shyǵara almaıdy. Qoǵam Ǵalymjan Jaqııanovty ashyq oıly, ádil, shynshyl, ustanymy jolynda qurbandyqqa bara alatyn adam dep tanıdy. Osyndaı maqtaýly minezderimen kóptiń kóńilinen shyqqan aıtýly azamat qapelimde júrisinen jańylyp júr. Sońǵy bes-alty aı kóleminde Ǵalymjan Jaqııanov tarapynan “Adyrna” ultttyq portalyna jasalǵan qysym bizdi osylaı aıtýǵa májbúrlep otyr.
2023 jyldyń 2-qańtary kúni “Adyrna” ulttyq portalynyń Iýtýb arnasynda "Ǵalymjan Jaqııanovqa senip edim" degen taqyryppen kásipker Toqtasynov Tólen Muhamedıulynyń suhbaty jarııalandy.
Árıne, bul portal úshin qalypty kóp suhbattyń biri ǵana edi. Qazaq elin bylaı qoıyp, jat el Mońǵolııada kásip istep kelgen, Ǵalymjan Jaqııanovtyń ómirlik dosy bolǵan, eks-depýtat Tólen Toqtasynovtyń aıtar oıyna, jeke pikirine shekteý qoıýǵa bizdiń haqymyz joq. Ol demokratııaly memleket qundylyqtaryna sáıkes óziniń ashyq oı aıtý quqyǵyn paıdalanyp, portalymyzdyń ıýtýb arnasyna ishtegi bar sherin aqtardy.
Tólen Toqtasynov pen Ǵalymjan Jaqııanov ekeýiniń arasyndaǵy qarjylyq daýly máselelerdiń jaryqqa shyǵýy, árıne, Jaqııanovqa jaqpapty. Arada eki kún ótpeı jatyp, ózin Jaqııanovtyń advokatymyn dep tanystyrǵan Mýstahım Týleev atty azamat "suhbatty óshirmeseńder, sotqa beremiz" dep qorqytýdy bastady. Olardyń logıkasyna súıensek, "Toqtasynov qylmysker eken. Bizdiń portaldyń qylmyskerden suhbat alýǵa haqysy joq eken-mis".
Artynsha, redakııamyzǵa bul suhbatty teristeıtin Jaqııanovtyń málimdemesi kelip tústi. Biz buqaralyq aqparat quraly retinde tizgindi teń ustap, málimdemeniń bir árpin de ózgertpeı "Tólen jeke basynyń qaryzynan qutyla almaı, endi maǵan jala jabýǵa kiristi" degen taqyryppen jarııaladyq.
4 qańtar kúni Jaqııanovtyń advokaty málimdemeniń oryssha nusqasyn jáne joldap, ony da jarııalaý kerektigin aıtty.
Biz oǵan da portal betinen oryn berdik. Bul málimdemeni sol kúnderi Jaqııanovtyń jary Qarlyǵash Jaqııanova Facebook-tegi jeke paraqshasyna salyp, oqyrmanǵa jappaı taratty.
Ǵalymjan Jaqııanov “Adyrna” ulttyq portalyna jarııalanǵan suhbat boıynsha, "Ar namysyma nuqsan keltirdi" dep Tólen Toqtasynovty sotqa berdi. Al, Tólen Toqtasynov Ǵalymjan Jaqııanovtyń oryssha málimdemesin negizge alyp, zań organdaryna júgindi. Qyzyǵy sol, Jaqııanov oryssha málimdemesinen dereý bas tartty. Osy ýaqytqa deıingi jarııalaǵan aqparattaryn joqqa shyǵaryp, sózden taıqyp shyǵa keldi.
Bizdiń qolymyzda advokat Mýstahım Týleevtiń jazbalary bar. Jaqııanov "Málimdemeni jarııalaý kerek" dep joldaǵan advokatynyń hatyn qoqysqa laqtyra salyp, bizge resmı hat ta joldady.
Maqtaýly demokrat adamnyń qubylyp shyǵa kelýin qalaı túsinýge bolady? Ózi, óziniń ómirlik jarynyń áleýmettik jelidegi paraqshasy arqyly taratqan málimdemesin myńdaǵan oqyrman oqyǵannan keıin óshire salyp, "Adyrnany" birjaqty qaralaý qanshalyqty ádiletti?
Abaıdyń "Bir janǵa eki kúımek ádilet pe?" degen sózi bar ǵoı. Sol aıtpaqshy, Tólen Toqtasynovtyń suhbatyna baılanysty, "qylmyskerden suhbat alýǵa haqylaryń joq" dep aıyptaǵandary azdaı, artynsha ózderi málimdeme joldap, odan taıqyp shyǵa kelýi "bir janymyzdy" eki kúıdirdi. "Qylmyskerden suhbat alýǵa haqylaryń joq" dep ústem talap qoıǵan Mýstahım Týleev bul kúnderi eki aıǵa qamaýǵa alynǵan. Ol Ǵalymjan Jaqııanovtyń ǵana emes, burynǵy Mádenıet mınıstri bolǵan Arystanbek Muhamedıulynyń da advokaty bolǵan eken. Qazir “Muhamedıulynyń jazasyn jeńildetý úshin sotqa iri kólemge para usyndy" degen aıyppen tergelip jatyr.
“Adyrna” ulttyq portalynyń qyzmetkerleri 5 qańtar kúni Jaqııanovtyń bizge suhbat berýin surap, búginde qamaýda otyrǵan advokaty Mýstahım Týleevke habarlasty. Ol kisi bul máselege qatysty ózimen jeke kelisý kerektigin aıtyp telefon nómirin berdi. Jaqııanov bizdiń ýatsap arqyly joldaǵan ótinishimizge pysqyryp ta qaramady. Tek mátindik málimdeme jasaýmen shyndyq ashylmaıtynyn aıtyp, Jaqııanovtyń ashyq oıyn portalǵa jarııalaýǵa daıyn ekenimizdi jáne bildirip, Facebook-tegi paraqshamyz arqyly da suhbatqa shaqyrdyq. Oǵan da jaýap bolmady.
Baspasóz zańdaryna sáıkes bizdiń búıregimiz esh tarapqa da burylmaıdy. Jaqııanov búgin kelisse, onyń aıtqan sózderin ózgertpesten búgin jarııalaýǵa daıynbyz. Óıtkeni, Ǵalymjan Jaqııanov taǵdyryn qurban etip, uzaq jyldar boıy kúresken demokratııanyń dańǵyl joly osy. Biraq, Jaqııanovqa qoǵamnyń aldyna shyǵyp, óz oıyn ashyq aıtýdan góri tasada turyp ulttyq portalǵa qysym jasaý, sol qysym arqyly portaldyń ıýtýb arnasynda jarııalanǵan Tólen Toqtasynovtyń suhbatyn alǵyzyp tastaý ǵana qajet sııaqty.
Bulaı deýimizge 2023 jyldyń 14 shilde kúni Ǵalymjan Jaqııanovtyń taǵy bir advokaty Iý.Vershınınanyń bizge joldaǵan sotqa deıingi shaǵym haty sebep bolyp otyr. Ol shaǵymda "Ǵalymjan Jaqııanovqa senip edim" atty Tólen Toqtasynovpen bolǵan suhbatty “Adyrna” portalynyń ıýtýb arnasynan óshirip, moraldi shyǵyn úshin 1 000 000 teńge tóleý qajettigin, eger kelispegen jaǵdaıda sotqa beretinin jazyp jáne qorqytypty. Osylaı Tólen Toqtasynovtyń Jaqııanov týraly aıtqan ýájderin tunshyqtyra salmaq kórinedi.
Ǵalymjan Jaqııanov syndy demokrat azamatqa bul laıyq is pe? Jaqııanovtyń Toqtasynovtyń aıtqandaryn Iýtýb arnamyzdan joıyp jiberip, onyń ashyq oı bildirý quqyǵyn shektep tastaýǵa haqysy bar ma? “Adyrna” ulttyq portaly Jaqııanovtyń ýájin jarııalamaı jatsa, tek Toqtasynovtyń sózin sóılep, negizsiz qaralasa, onda sotqa júginýge bolar. Ózi ashyq suhbatqa kelispeı, Toqtasynovpen teń dárejede portal usynǵan minberge shyǵyp, toıtarys berý quqyn paıdalanbaı otyryp, moraldik shyǵyn talap etýi qanshalyqty ádiletti? Jaqııanov degen abyroıly atpen onsyz da qal-jaǵdaıy máz emes qazaq basylymynan moraldik shyǵyn talap etýi qaı qısynǵa saı keledi?
Bul suraqqa bálkim, Ǵalekeńniń ózi jaýap berip qalar! Qazaq qurmet tutqan azamatqa qarsylyq kórsetip, oǵan tize batyrý oıymyzda joq. "Qısynsyz qysym jasap, aǵamyz jańyla kórmese eken" degen izgi nıetpen osymen toqtaımyz!
Qurmetpen, “Adyrna” ulttyq portaly
