بەلگىلى اكتەر ازامات ساتىبالدى شاكەن ايمانوۆ اتىنداعى «قازاقفيلم» اكتسيونەرلىك قوعامىنىڭ پرەزيدەنتى قىزمەتىنە تاعايىندالدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى ”ادىرنا” ۇلتتىق پورتالى.
كينوستۋديا ۇجىمىنا جاڭا باسشىنى مادەنيەت جانە سپورت ءمينيسترى اسحات ورالوۆ تانىستىردى. مينيستر «قازاقفيلم» كينوستۋدياسىنىڭ جۇمىسىن ۇيلەستىرۋ ابىرويلى ءارى جاۋاپتى مىندەت ەكەنىن ايتتى.
وتاندىق كينوونەردىڭ قارا شاڭىراعى سانالاتىن “قازاقفيلم” — اۋقىمدى جانە كۇردەلى وندىرىستىك ۇيىم. بىلتىر كينوستۋديا جانىنان «قازاقانيماتسيا» شىعارماشىلىق بىرلەستىگى قۇرىلدى. مەملەكەت باسشىسىنىڭ كينوستۋديا جۇمىسىن جاڭعىرتۋ جونىندەگى تاپسىرماسىن ىسكە اسىرۋ ءۇشىن 87 تەحنيكالىق جابدىق ساتىپ الىندى. الداعى ۋاقىتتا، مودەرنيزاتسيانىڭ ەكى كەزەڭىن باستاۋ كەرەك،- دەدى اسحات ورالوۆ.
سونداي-اق، ول مينيسترلىك 2030 جىلعا قاراي جالپى كينوپروكاتتاعى وتاندىق فيلمدەردىڭ، ونىڭ ىشىندە انيماتسيالىق فيلمدەردىڭ ۇلەسىن 36 پايىزعا دەيىن ۇلعايتۋعا نيەتتى ەكەنىن مالىمدەدى. بۇل رەتتە پروكاتتاعى قازاق تىلىندەگى فيلمدەردىڭ ۇلەسىن 30 پايىزعا دەيىن جەتكىزۋ كوزدەلىپ وتىر. مينيستر كينوستۋديانىڭ جاڭا باسشىسى مەن ۇجىمىنا ساتتىلىك تىلەپ، تابىستى جۇمىس اتقاراتىنىنا سەنىم ءبىلدىردى.
ايتا كەتەيىك، ازامات ساتىبالدى ۇزاق ۋاقىت م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ەڭبەك ەتتى. عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىن باسقاردى. بۇگىنگى كۇنگە دەيىن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى قىزمەتىن اتقاردى.
