بەلگىلى كاسىپكەر رايىمبەك باتالوۆ قازاقستان پرەزيدەنتىنىڭ كاسىپكەرلىكتى دامىتۋ ماسەلەلەرى جونىندەگى شتاتتان تىس كەڭەسشىسى قىزمەتىنە تاعايىندالدى، دەپ حابارلايدى "ادىرنا" ۇلتتىق پورتالى.
رايىمبەك باتالوۆ بۇعان دەيىن "اتامەكەن" ۇلتتىق كاسىپكەرلەر پالاتاسىنىڭ پرەزيديۋم توراعاسى قىزمەتىن اتقارعان. ول بۇل ۇيىمدى 2022 جىلعى اقپاننان 2026 جىلعى قاڭتارعا دەيىن باسقارعان.
جاڭا قىزمەتىندە باتالوۆ وتاندىق كاسىپكەرلىكتى قولداۋ، بيزنەس-كليماتتى جاقسارتۋ جانە جەكە سەكتوردىڭ دامۋىنا قاتىستى ماسەلەلەر بويىنشا پرەزيدەنتكە كەڭەس بەرەدى.
رايىمبەك باتالوۆ – قازاقستانداعى ەڭ ىقپالدى كاسىپكەرلەردىڭ ءبىرى. ول Raimbek Group حولدينگىنىڭ يەسى جانە ديرەكتورلار كەڭەسىنىڭ توراعاسى. حولدينگ قۇرامىنا Raimbek Agro, Raimbek Bottlers Group جانە Pure Pack كومپانيالارى كىرەدى. باتالوۆ FMCG جانە ينۆەستيتسيا سالاسىندا تابىستى جۇمىس ىستەپ كەلەدى.
سونىمەن قاتار، ونىڭ ەڭبەك جولى ءوندىرىس پەن باسقارۋدىڭ ءتۇرلى سالالارىن قامتيدى: "ريددەر ينۆەست" مەتاللۋرگيالىق كەشەنى، "نوۆودجامبۋل فوسفور زاۋىتى", توبىل ەلەۆاتورى، مەركى قانت زاۋىتى جانە شىمكەنت جەو-3 كاسىپورنىن باسقارعان. 1992 جىلدان باستاپ "رايمبەك" ساۋدا فيرماسىن قۇرىپ، Raimbek Group حولدينگىن دامىتقان.
رايىمبەك باتالوۆ كاسىپكەرلىك پەن قوعامدىق ينستيتۋتتاردى دامىتۋعا باعىتتالعان بىرنەشە ماڭىزدى قۇرىلىمداردا قىزمەت اتقارعان.
ول 2002 جىلى قازاقستان كاسىپكەرلەرى فورۋمىنىڭ كەڭەسىن باسقارعان، 2005 جىلى شانحاي ىنتىماقتاستىق ۇيىمىنىڭ ىسكەرلىك كەڭەسىنە جەتەكشىلىك ەتتى، 2007 جىلى پارلامەنت ءماجىلىسى جانىنداعى قوعامدىق پالاتا مۇشەسى، 2009 جىلى قازاقستان سۋاستى سپورتى فەدەراتسياسىنىڭ پرەزيدەنتى، 2010 جىلى پرەمەر-مينيستر توراعالىق ەتەتىن بىرىڭعاي ۇيلەستىرۋ كەڭەسى مەن پرەزيدەنت جانىنداعى كاسىپكەرلىك جونىندەگى كەڭەستىڭ مۇشەسى بولسا، 2012 جىلى ەۋرازيالىق ەكونوميكالىق كوميسسيانىڭ كاسىپكەرلىك ماسەلەلەرى جونىندەگى كونسۋلتاتيۆتىك كوميتەتىنىڭ ساراپشىسى، 2015 جىلدان – Enactus Kazakhstan ديرەكتورلار كەڭەسىنىڭ توراعاسى، قازاقستان ۆەلوسپورت فەدەراتسياسىنىڭ ءبىرىنشى ۆيتسە-پرەزيدەنتى قىزمەتىن اتقارعان.
ال 2017 جىلدان ازيا ۆەلوسپورت كونفەدەراتسياسىنىڭ ۆيتسە-پرەزيدەنتى، 2022 جىلى پرەزيدەنت جانىنداعى رەفورمالار جونىندەگى جوعارى كەڭەستىڭ مۇشەسى، "دامۋ" كاسىپكەرلىكتى دامىتۋ قورى ديرەكتورلار كەڭەسىنىڭ مۇشەسى جانە پرەزيدەنت جانىنداعى ۇلتتىق قۇرىلتاي مۇشەسى بولدى.
رايىمبەك باتالوۆ جاڭا قىزمەتىندە وتاندىق بيزنەس پەن جەكە سەكتوردىڭ دامۋىنا باعىتتالعان ستراتەگيالىق شەشىمدەر قابىلداۋعا ىقپال ەتەتىن بولادى.
