ۇكىمەت شىعىس قازاقستان وبلىسىنداعى ريددەر قالاسىنىڭ ءجىلۋى جۇيەلەرىن جوندەۋگە 8 ميلليارد تەڭگەدەن استام قارجى ءبولدى. بۇل تۋرالى قر ۇكىمەتى ءتيىستى قاۋلى قابىلدادى، دەپ حابارلايدى “ادىرنا” ۇلتتىق پورتالى.
قاۋلىعا سايكەس، 2023 جىلعا ارنالعان رەسپۋبليكالىق بيۋدجەتتە كوزدەلگەن ۇكىمەت رەزەرۆىنەن كەزەك كۇتتىرمەيتىن شىعىندارعا شىعىس قازاقستان وبلىسىنىڭ ريددەر قالاسىنا جالپى سوماسى 8 ميلليارد 400 ميلليون تەڭگەگە جۋىق قاراجات ءبولىندى.
“قاراجاتتىڭ باسىم بولىگى قازاندىقتار مەن جىلۋ جەلىلەرىن كۇردەلى جوندەۋگە باعىتتالادى. سونىمەن قاتار قاراجات وتىن بەرۋ گالەرەياسى مەن اسپيراتسيا جۇيەسىن كۇردەلى جوندەۋگە جۇمسالادى”، – دەلىنگەن پرەمەر-مينيستر سايتىنىڭ حابارلاماسىندا.
ەسكە سالايىق، 2023 جىلدىڭ 23 ناۋرىزىندا ريددەر جەو-داعى №6 قازاندىق جانىنداعى وتىن بەرۋ گالەرەياسىندا كومىر توزاڭى جارىلىسى بولعان ەدى. جارىلىس تولقىنى شامامەن 80 شارشى مەتردى قۇرايتىن قورشاۋ قۇرىلىمدارىن قيراتىپ، وبلىس كولەمىندە توتەنشە جاعداي رەجيمى جاريالاندى.
